電影《公主復仇記》前晚首映，台下照玩復仇。話說鄭秀文前助手阿爽的胞姊Serena一見前來看戲的鄭秀文經理人郭啓華，即大罵對方「X街」。事後郭啓華雖否認事件，但Serena卻直認不諱，並寸郭啓華「慣咗擘大眼講大話」。
電影《公主復仇記》前晚在尖沙嘴舉行首映，男主角吳彥祖因病未能出席，只有女主角鍾欣桐（阿嬌）和陶紅撐場，但阿嬌遲了半小時才出現，其他嘉賓則有杜汶澤與女友田蕊妮、袁潔瑩、張達明和雷宇揚等。
前晚鄭秀文經理人郭啓華亦有捧場，但他竟被坐在前排的鄭秀文前助手阿爽的胞姊Serena當眾大罵：「X街！邊個請你嚟㗎！」郭啓華口窒窒說：「我、我有飛呀！」Serena又說：「美亞個場唔歡迎你呀！」郭啓華進退不得，坐在前排的觀眾暗自竊笑，幸好此時電影開始播放，但郭啓華有否繼續看戲則不得而知。原來Serena近日擔任美亞的巿務總監，據知她事後即時質問導演彭浩翔「係咪你請佢嚟㗎」，彭浩翔表示不知情。
昨日記者致電郭啓華問他是否被Serena罵，他說：「冇呀，我哋只係打招呼，佢問我『嚟捧場呀』，我答話『係呀，嚟捧場』。」記者指很多觀眾聽到他被罵，郭啓華說：「咁奇怪嘅？點會呀，現場咁多記者，點會啫。」
而Serena則直認鬧郭啓華，她在電話中說：「係呀，我係鬧佢呀，做得出唔怕認。」對於郭啓華稱跟她打招呼，Serena說：「我就冇咁多招呼同佢打嘞，我淨係同好人打招呼啫。」對於郭啓華不承認被鬧，Serena說：「呢啲叫物似主人形，大家都慣咗擘大眼講大話。」
另外，自稱因塞車而遲到的阿嬌，被指翻𠝹陳冠希，並與對方同日往日本，她說：「唔好玩啦，我夠同周星馳同日到囉，重同吳彥祖同一班機㖭！」至於陳冠希的緋聞女友應采兒涉嫌藏毒，阿嬌稱不認識對方，故不便多言。
採訪：張止寒、魯萍
攝影：何國豪
