昨日傳出股神畢菲特代表拜訪中國人壽（2628），斷估不是為了替股神買人壽保險，消息令市場憧憬股神擬入股國壽，刺激國壽股價勁升3.7%，收5.60，成交高達7.85億元。大家如果唔善忘，股神亦曾入股中石油（857），並不斷增持，結果刺激股價大幅攀升。
何生話賭業乃澳門龍頭產業，不可能注入香港公司之內，又否認新濠（200）乃賭業旗艦股，當堂令賭業概念股打個冷震，其中新濠更大跌16.19%。而澳門實德（487）增持十六浦股權後，噚日復牌股價一度勁升近80%，收報1.42元，升53%，成交高達4.34億元。
收市後，澳門實德傳以每股1.16-1.32元，配售3.17億股予基金，如果冇貨派出街，繼續炒上機會大。不過，澳門實德今日重得唔得就好難講，因為香港上市公司參與澳門賭業賺大錢的憧憬，已幾乎被何生言論摧毀。肥水不流別人田的道理，大家都心知肚明，唔少公司都係想沾些少濠江概念，博炒番轉而已，點會認真到以為可參與澳門賭業呢？
摩根大通8月初出報告，睇好上海置業（1207）見1.15元，而股價亦由0.55元升至0.75元水平徘徊。聯交所資料顯示，摩根大通坐言起行，增持上海置業至逾5%股權，噚日阿虎仍見佢個牌買貨。
黑客話，由於上海置業今年踏入收成期，盈利表現不俗，大戶憧憬公司會慷慨派息。不過，現時國內加息兼宏調，令房地產業務前景不明朗，會影響管理層的派息政策，散戶跟炒要小心。
阿虎