渣打地震，仍然係市場話題，但有唔少公司就高調話請人，最特別應該係專做樓宇按揭轉介生意嘅經絡集團。
該公司副行政總裁盧子勇話，要聘請按揭客戶主任，成功獲聘嘅，重可以攞到一千蚊開工利是。不過，想應徵嘅就要快手，因為到十二月十五號截止嘞。
盧子勇表示，增聘人手，原因係過去兩個月，透過該公司申請按揭嘅個案趨增，幅度達四成。
講開請人，利記執董廖偉強話，公司年底會請多三百個前線及後勤員工，配合公司發展。重話，先考慮請渣打被裁嘅員工，因為佢哋擁有豐富嘅營銷經驗。
另外，美記都話上個月定下大計，年底前請五百人，𠵱家已經請咗百零個，重有逾三百個空缺。
樓市興旺，相關行業一樣好景，大家爭住請人。
間唔中會聽到有筍盤成交，好多時係業主急於套現，所以至肯平賣。不過，最近有一宗低價成交，竟然話係因為業主「唔知價」，至會平賣。
個單位係西灣河鯉景灣逸康閣低層F室，五百七十一呎。業主近月從外國回流，見樓市好景，於是放售單位。件貨早年以二百八十萬買入，𠵱家以二百二十六萬賣出，低市價一成。買家係投資者，買嚟短炒。
聽講，業主係「唔知定」至肯平，結果蝕咗五十四萬，成四分一咁多。
蘭西覺得，若果業主係唔知價賣平咗，咁代理係咪有責任呢？
荃灣區兩個新盤輪流推出，新地嘅爵悅庭上月搶攻後，華置嘅樂悠居，又準備開賣。地產代理行，噚日提交有意大手入市嘅買賣資料畀發展商，等華置回覆。
華置柯靄邦話，有準買家大手洽購二十伙。美記布少明話，佢哋噚日提交咗成十個投資客嘅資料畀發展商，個別想大手買入四十伙。
另中記打算送出五個名額，請買家去美國迪士尼樂園玩，總值二十萬。
屯門地膽祥益總裁汪敦敬話，經過三次競投，擊敗兩大集團，以月租十五萬，搶到海典軒地舖開分行（圖五）。有四五組主管想坐呢個位，決定用計分制嚟揀話事人。兩周前開始，凡促成交易、獲得獨家代理權等都有一分，至下月中，攞到最多分嘅一組，就可以做話事人。
新舖係雙連，重係海典軒唯一嘅代理地舖，有千一呎，鄰近南浪海灣、翠寧花園及兆麟苑，潛力厚。祥益喺屯門已經有二十間分行。
北角城市花園（圖六）十二座低層A銀主盤，近千二呎，連平台三百七十呎，銀主原先開價四百九十萬，點知有多個買家搶住買，最後以近五百三十四萬成交，每呎四千五，比底價高九巴仙，可能連銀主也始料不及。
單位咁搶手，中記林龍南話，因為附靚裝修，同埋享內園景。
屋苑今個月暫時得嗰三宗買賣，係上月同期嘅一半，所以部份業主肯擴闊議價幅度五至八巴仙。
新落成屋苑市況明顯比老牌屋苑優勝，但有乜理據支持呢？中記有個例子畀大家睇。
佢哋話，西九龍三寶，即長沙灣昇悅居、泓景臺及宇晴軒，上月二手流通比率由一點二四巴仙至一點九巴仙，比老牌屋苑荔枝角美孚新邨嘅零點九八巴仙為高。
所謂二手流通比率，係以屋苑嘅成交量除以單位總數得出，流通量愈高，表示交投愈活躍，意味若果要放盤，容易啲賣得出。
因此，雖然美孚首十個月有超過一千宗登記，但計流通比率就低過西九龍三寶嘞。
電郵地址：
