噚日電影貸款保證基金公布批出第七宗貸款保證，由中國星投資，劉青雲、應采兒、鄭中基、張栢芝主演嘅賀歲片《喜馬拉亞星》得到貸款，香港華人財務有限公司會提供五百二十五萬貸款，政府重保證如果電影公司還唔到錢，政府會承擔一半嘅還款。
馮仁昭覺得好奇怪，點解連中國星呢啲上巿大公司，都要向政府嘅電影貸款保證基金申請貸款，咁政府又以乜嘢準則批保證基金呢？
影視及娛樂事務管理處發言人話只要係本地電影公司，過去十年拍過三套戲以上，用嘅演員同工作人員一半以上係香港永久居民，咁就符合資格，可以申請。
中國星老闆向華強就呢件事回應，話因為佢係影協嘅名譽會長，下次開會討論嘅題目，就係電影貸款保證基金係咪真係幫到香港電影，佢為咗想知道成個申請過程，所以用呢套賀歲片嚟申請，睇吓過程中會碰到乜嘢困難。
向華強重話套戲投資三千萬，五百幾萬只係佔咗套戲嘅好小部份投資。
喺外地宣傳緊新碟嘅女子組合S.H.E，早前趁空檔為新歌《痛快》拍MV，成員Selina、Ella同Hebe喺MV中分別會扮貴婦、儍妹fans。而其中一場濕身戲就最搶鏡，導演喺地下灑咗一大灘水，重不停搵人濺起水花，但都重嫌未夠喉，最後乾脆攞住水喉係咁射，同佢哋玩個痛快。
譚詠麟同李克勤日前喺大馬開演唱會，阿倫踢爆克勤同盧淑儀籌備緊婚禮，噚日阿倫由大馬返港，記者即時追問佢呢件事，阿倫話自己只係講吓笑，重話：「呢啲嘢日日都進行緊㗎啦。」跟住又反問記者係咪諗住結婚，認真玩嘢！
日本國腳中田英壽上年俾日本狗仔隊偷拍到喺酒吧同女星宮澤理惠濕吻而哄動一時，後來壽仔以侵犯私隱名義告刊登嘅日本雜誌。而噚日法庭判有份轉載輯相嘅日本雜誌《週刊現代》賠償十二萬日圓（約九千港元）。但《週刊現代》嘅編輯部就話唔明點解正確報道都要賠錢。
梁靜茹噚日去商台接受訪問，她話嚟香港前一日喺台灣遇到地震，梁靜茹話：「都幾驚，每次我有大事做之前都有地震，我公司講笑咁話愈震愈旺。」梁靜茹又話地震一刻佢即刻諗住走出門口，點知想走嗰陣又即刻唔震。
