個市氣勢冇得彈，恒指輕易彈升嚿半，距離萬四點只相差328點，睇吓幾時破關。
滙控C輪：滙控（005）唞完1日又嚟過，收132.50元，升1.5元，創歷史新高，較前日亦高出1格。昨日倫敦早段，滙控再造好啲，睇吓美國ADR又點。
貨比三家冇蝕底，例如昨日推介中企C輪，要2204，升15%，跑贏同類輪4545（升幅8%）。滙控C輪有得睇，遠期嗰批，𠵱家最啱買嘅係4445，明年6月到期，輪價64仙，負溢價0.1%，槓桿率20.7倍（有效12.9倍），引伸波幅12.5%。滙控派第3季息1.01元，相等於股價0.8%，計埋呢個因素，揸4445都係好着數。而且，滙控咁多年，每次除息，習慣三扒兩撥上番舊價，然後超越舊價，為咗股息因素走寶就非常唔抵。
中銀C輪：滙控創新高，中銀（2388）郁10仙，收14.55元。中銀歷史高位15.90元，有機會跟埋滙控上去，見高位然後破高位，係時候搵隻中銀C輪炒吓搵錢。
中銀C輪好易揀，因為冇得揀，得隻9169，其他嘅一係數據唔靚，一係交投唔得。9169明年2月夠鐘，夠鐘前正股冇息派，唔使理股息因素，冇溢價就係冇溢價，昨收21.5仙，升幅2.9%唔夠，成交由16球去到40球，熱身中。中銀見新高15.90元計，隻輪值35仙，有上升空間63%。
恒指C輪：個市若然繼續去，恒指C輪唔會冇份升。炒短期C輪，揀9911；炒中期輪，揀4444。
章盛