《法國足球》雜誌噚日公布咗今年歐洲足球先生五十個候選人名單，大致上冇咩驚喜，唔需要詳列你都知係邊班人角逐。你問我求驗客嘅話，我就睇好「細哨」朗拿甸奴贏硬。名單公布後，怕且最唔開心應該係落選嘅魯爾。
話晒魯爾都係一代射手，曾經有好多名將話魯爾係佢哋心目中嘅歐洲足球先生，染指呢個獎係遲早嘅事；可惜一年復一年都冇行，今年重衰到連候選名單都冇份，記憶中係近年首次，反映佢事業確實陷入低潮。
一如以往，呢個獎將會響下個月公布，「細哨」過去一年弗到漏，佢踢嘅巴塞又係家陣歐洲最紅嗰隊，聲勢贏晒。勉強有機會威脅佢嘅，可能得曼聯嘅朗尼、AC米蘭嘅舒夫真高、國米嘅阿祖安奴……，咦，好似數漏咗個亨利喎，不過睇佢近排嘅表現就……。
西班牙傳媒話，皇馬會喺羅賓奴阿媽瑪蓮娜俾綁匪釋放之後，先至正式宣布羅賓奴加盟。但班綁匪捉咗瑪蓮娜後就冇接觸過羅賓奴，有指佢哋想喺皇馬公布畀幾多錢（聽講係年薪二百萬歐元）羅賓奴後，先再要求贖金。羅賓奴想救阿媽，睇嚟要催促皇馬。
我求大俠收到風話亨利啱啱轉會。但阿仙奴球迷唔使驚，呢位法國球星唔係轉球會，而係轉贊助商，由可口可樂跳槽過百事；而且會同碧咸、卡路士同魯爾等皇馬球星，一齊拍攝百事新一輯廣告。皇馬不嬲對亨利有興趣，唔知佢哋會唔會搵碧咸等做說客，游說亨利過檔呢？
從皇馬外借嘅球員甚少成功例子，偏偏就不斷有球會同佢哋借人用。咁耐以嚟，除咗摩連迪斯喺摩納哥有作為外，去過列斯嘅巴禾、慕遜加柏嘅魯賓、今季意甲聯升班隊費倫天拿嘅樸迪路，全部都冇料到！𠵱家輪到禾夫斯堡想借另一年輕衞將美治亞，佢哋唔知「前車可鑑」？
太陽噚日將「日本佐敦」田臥勇太列入傷兵名單，讓路畀啱啱簽約嘅前鋒歐羅。有人話田臥喺太陽日子無多，其實太陽點會咁易放走嚟隻「招財貓」。喺美國棒球有鈴木一朗，籃球就有田臥勇太，兩個都係日本人氣最勁嘅體育明星，太陽要搵多啲日圓，當然要留住田臥喇！