美國總統布殊競選連任，伸張正氣，薄海歡騰，中國國家主席胡錦濤發出賀電，高度擦鞋，大讚四年來布殊對亞太及世界和平，起咗積極作用！
布殊得到胡總咁正面嘅勉勵，又點可以令中國戰略盟友失望呢？尚未宣誓連任，即時揮軍攻打伊拉克邪惡之城費盧杰，向有「小拉登」之稱嘅伊斯蘭恐怖魔頭扎卡維宣戰！
費盧杰之戰，將會十分慘烈，因為恐怖軍手段殘酷，英美日等國多名人質，都在費盧杰慘遭斬首！美軍如有被俘，下場又會係點？
呢一仗好難打，但美國係自由民主世界嘅大哥，邪不能勝正，美軍勇上火線，為文明世界付出鮮血及生命嘅犧牲，為咗二十一世紀及打後三五百年，繼續貴為超級強國。
五十年來，美國參加韓戰，跟住又出兵越南，再打埋兩場海灣戰爭，每次都站在抵抗邪惡帝國嘅最前線。今時今日，成為中共領導人太子黨房地產貪污黑金天堂，亦係全球愛好自由人民嘅夢鄉。布殊身為世界和平使者，費盧杰之役，許勝不許敗，全港市民（維園阿伯除外），都衷心希望布殊旗開得勝！
由於係戰爭時期，傷及無辜難免。在炮火中不幸殉難嘅伊拉克平民，八方唯有同佢哋念多幾次經，希望佢哋來生投胎轉世，向真神阿拉抽籤國籍嗰陣，可以好運少少。
至於進軍費盧杰嘅美軍，佢哋係人類英雄，今次出征，氣壯山河，可以與登陸月球嘅太空人相比。香港人為佢哋打氣，希望佢哋早日凱旋歸來！
美國動用暴力，濫殺無辜？比起六四嘅鄧小平屠殺自己平民，都係鬼咁碎料。四川農民暴動、挾持省委書記，呢兩日聽講中央都已出動解放軍入川，封城鎮壓！
講到追剿恐怖分子，維持大局穩定，布殊同胡總，大家殊途同歸，英雄所見略同，八方一向愛國，所以今次亦瞓身擁護布殊連任，支持美國深化攻伊聖戰，為布殊及美軍更積極地促進世界和平而鼓掌！連財政司司長唐唐都識得掹車邊咁講：「布殊當選，對香港有利」，即係美國愈強，香港經濟愈有支撐。
本港有一小撮反華敗類，長期咒罵經常通直線電話嘅胡總嘅好友布殊，企圖挑撥兩人友情，豈知人哋布殊連任成功，摑咗佢哋一巴，而且攻打伊拉克，布殊重必將得勝，呢班人，遲早又再跌碎多一次眼鏡嘅！
傳真︰2623-9278
電郵︰