早前承認隆胸的模特兒樂基兒，前晚在上海出席一牛仔褲派對，真空凸點行騷。而與她一樣曾跟陳平治相戀的李嘉欣，則罕有地酥胸半露、以性感打扮亮相。李嘉欣大讚樂基兒敢隆胸敢認的作風，笑言亞洲女人胸大只肯說自己多喝了木瓜湯。
李嘉欣前晚穿上黑紗透視上衣，配皮草及度身訂做的牛仔褲，罕有地以性感打扮出席牛仔褲品牌Levi's假上海Zin餐廳舉行的二○○五春夏預展及派對，同場演出的模特兒包括有早前公開承認隆胸的名模樂基兒，而嘉欣與樂基兒均曾與男模陳平治（Perry）拍過拖。
前晚牛仔褲騷的氣氛十分熱辣辣，有外籍模特兒赤裸上身、僅以雙手掩胸示範牛仔褲。問李嘉欣對樂基兒承認隆胸一事的看法，嘉欣說：「我最鍾意人坦白，古今中外都冇乜人認過自己隆胸，個個亞洲女人胸大都係話自己多飲木瓜湯嘅啫，佢（樂基兒）好可愛。」但嘉欣卻表示自己如非病痛都不會做手術，更遑論整容隆胸，她說：「誇張身材都係唔多啱我，我唔會為咗貪靚去整容，如果可以整，我寧願增高四吋，人高啲睇嘢視野都唔同啲。」
前晚嘉欣穿上釘滿施華洛世奇水晶的限量版牛仔褲出現，她透露自己擁有過百條牛仔褲，她說：「我最鍾意買古着牛仔褲，最貴嗰條超過一萬蚊。着牛仔褲最緊要屁股有肉，我日日都有做向後踩嘅stepper十分鐘，以收緊屁股嘅線條。」嘉欣透露今年拍戲產量雖不多，但卻接拍了十五個廣告，收入甚豐。至於又有藝人涉嫌藏毒，嘉欣說：「做藝人應該要有社會責任，希望圈中唔好再有呢啲風氣。」問她有否試過被引誘吸毒？她說：「我都唔去蒲嘅，冇人引誘倒我。」
樂基兒前晚真空穿上黑色tubetop凸點行騷，問她有沒有膽量像洋模般赤裸上身演出？她說：「大會都冇要求，不過我都唔會肯。」最近她頻頻成為雜誌報章頭條，樂基兒說：「我冇特別開心，啲雜誌我全部都冇睇過，佢哋都冇訪問過我，唔使睇都知係作㗎啦。」記者告之她李嘉欣讚賞她坦白勇敢，她說：「個個朋友，包括傳媒都對我好好，好支持，多謝晒大家。」
