數碼影音：富士SuperCCD力撐<br>三菱200萬像素手機全港最勁

數碼影音：富士SuperCCD力撐
三菱200萬像素手機全港最勁

當韓國三星已經出到500萬像素影相手機，睇番香港方面就重係玩緊百零萬像素，真係有啲心酸。不過日前香港用家終於都可以「升級」，皆因連第一部百萬像素手機都未喺香港賣過嘅三菱，日前就正式發表全港首部200萬像素影相手機─M900，一跨就上到200萬像素，絕對係黑馬跑出兼且跳級出擊！
記者、攝影：劉耀祥
ImageGirl：Dicky

好多香港用家羨慕日本手機點靚點正，不過今次M900就打破「隔籬飯香」嘅傳統，因為M900除咗由日本版D506i完全移植過嚟之外（連外形都一樣），最開心就係GSM版本規格更勝日本PHS版，外芒由6萬5色升級至26萬色，邊個話日本人淨係識收埋好嘢畀自己！

■採用富士龍鏡頭兼SuperCCD，明顯比一般影相手機鏡頭大。

■鏡頭乃旋轉式設計，會跟隨機蓋旋轉，合上先可以向外影。

旋轉鏡頭一鏡兩影
日本人嘅Design的確有一手，睇見M900機背成個相機Look，都知道打開機背個蓋就會見到個鏡頭，不過打開機身一樣見到另一個鏡頭，起初以為係雙鏡頭設計，查實M900採用旋轉式鏡頭設計，合埋部機鏡頭就啱啱好向住機背，打開部機就見到個鏡頭向住自己玩自拍，可以玩相機Look影相或者傳統手機Look影相。創意十足，不過向住人影相嗰陣就一定要用外芒，稍為不便。外芒都係26萬色，１.5"亦夠大，影相都清楚，之但係就略嫌浪費咗個靚靚嘅320×240像素26萬色內芒，只係玩自拍先用到。
而M900個鏡頭貴為全機主角，絕對唔係一般質素，大大隻字寫明用上富士龍鏡頭，就連感光元件亦用埋富士嘅SuperCCD，200萬像素最高可拍攝1,224×1,664像素相片，直情係將數碼相機個規格搬入手機。

■大畫面、大按鈕，兼且大機身，充滿200萬像素王者貴氣。

■外芒達1.5吋大，影相一樣睇得清清楚楚，不過當然唔及睇內芒咁舒服。

內置Mini-SD插槽
睇型號都知，M900絕對係三菱嘅王牌高階機種，所以機內規格亦理所當然地凌駕於現時一眾三菱機種。首先淨係個雙26萬色芒，已經夠晒睇頭，尤其內芒備有320×240像素，繼SHARPGX32及SonyEricssonS700i之後，第三部採用呢種解像度，唔好話睇相，就連功能介面都覺得靚過人。聲效亦屬現時最高級別，支援64和弦，以及最實用之MP3鈴聲。內置15MB記憶體似乎偏少，之但係M900設有Mini-SD插槽，唔夠加到夠為止。
雖然規格已經相當出色，不過亦有不足之處，首先機身體積同樣咁強「大」，莫講女用家，男用家都係啱啱好。其次就係未有內置藍芽，下下要靠紅外線，冇得駁藍芽Handsfree外，Send歌Send相都冇咁方便。

■內置Mini-SD插槽，隨機更附送32MBMini-SD卡。

■喇叭位於機底，聲量雄厚，開機更會播晒成首《多啦A夢》畀你聽。

■功能介面一貫三菱機格局，不過畫質當然靚好多。

200萬像素試相區
採用富士SuperCCD技術嘅手機真係第一次登陸香港，究竟效果係咪真係咁「Super」？不如睇吓相自己分辨！

睇人像：細微位都算清楚，Model衫上嘅圖案都幾Sharp，不過測光就弱啲，Model身處側光位，塊面都已經黑晒。

睇反應：筆者本想拍攝地鐵車頭，按下快門之時車頭仍有一段距離，不過出嚟效果就只有車身，反應只屬一般。

PROFILE
制式：GSM900/1800雙頻
外芒：26萬色/120×160像素/TFD
內芒：26萬色/320×240像素/TFD
鏡頭：200萬像素SuperCCD（10倍數碼變焦）
記憶體：內置15MB＋Mini-SD卡槽
功能：64和弦、MP3鈴聲、紅外線、GPRS、MMS、JAVA
備用時間：60-200小時
通話時間：2-4小時
體積：105×49×24mm
重量：125g
查詢：25700722（菱電國際）

約$4,500（11月中推出）

■M900充滿東洋手機風味，當然喇，M900乃由日版D506i完全移植！