沙田陳師奶嘅親戚自加拿大回港放假，大肆購物，因為香港啲T恤、衣服，只要係本港牌子，真係平過加拿大好多。移民得耐，享受清淡生活，就唔肯花錢買意大利法國名牌嘅嘞，你估加拿大嗰邊人工易賺咩。
買得衫多，陳師奶親戚話要行書局，原來佢哋在多倫多喜歡睇「壹仔」、《明周》，讀過唔少肥佬黎嘅「壹仔」專欄。行到入沙田商務書局，兩人望吓望吓，搵唔到肥佬黎嘅書，親戚於是問一位男性年輕服務員：「請問有冇黎智英嘅書呀？」服務員：「好似未聽過喎，黎智英個名點寫呀？」陳師奶與親戚估唔到有此一問，於是話：「巴黎個黎，智慧個智，英雄個英。」服務員搖頭：「未聽過呢個作家。」兩人於是又去沙田大眾書局，得到類似回應，冇符。返到屋企，親戚嘅細佬講：「唔係呀？書局連黎智英都唔識？我喺浸會大學圖書館見到黎智英嘅書擺喺文學類噃！」黎智英嘅書係文學類？真係見仁見智！
啲年輕書局售貨員可能只睇《壹本便利》，唔睇「壹仔」，所以唔識黎智英專欄。講起「壹仔」，上期似乎捉到鹿唔脫角，封面用李柱銘幅黑口黑面相片，標題係民主黨乜乜（唔記得咗）。今時今日，李柱銘講民主黨，算係票房毒藥，故此上星期三下午在中環出售，好多人望吓封面就行人。點知到星期五《明報》訪問胡定旭，話「壹仔」講佢老竇，令人痛心，於是好多老友撲去買「壹仔」，S總裁對左丁山講：「我哋素來知道胡定旭做得嘢，家庭悲劇完全唔關佢事，但講真，乜個古仔咁奇情曲折呀？雖然唔知有冇渲染，但寫得好好睇喎，如果『壹仔』封面唔係李柱銘而係胡定旭，標題寫醫管局主席身世大揭秘，中環會賣多好多本啦！」咁又係，「壹仔」揀錯封面，與一貫作風不符，奇怪也。