澳門概念股炒風未停，當地樓市一樣熾熱，好似舖位咁，旺區放盤叫價過萬蚊一呎，拍得住本港市區二線街舖。
高士德大馬路十五A舖，現由Nokia租用，地下近千四呎，閣樓四百三呎，連租約放售，叫價二千八萬，呎價逾萬五。同街由帝邦金舖以每月兩萬九租用嘅舖位，九百呎，索價逾千萬，每呎近萬二。𠵱家北角英皇道街舖，呎價係萬五蚊。
喺澳門開咗兩間分行嘅美記，計劃再開，最近開始喺本港報章賣吓澳門樓盤廣告，當中亦都有啲平貨，花王堂街，二千呎，叫兩百四萬，每呎都係千二蚊；南灣大馬路一個萬一呎舖，就索價一千萬，呎價九百，夠吸引。
澳門樓市有可為，中原都計劃月內喺澳門開四間分行，睇中記網頁專欄講，澳門報紙都有報道呢單消息。
渣打突然炒魷，全城矚目，不過，都有唔少公司請人與加薪，咁打工仔前景都冇咁悲。利記執董廖偉強話，有見於樓市好景，公司頭十個月業績比預期理想，所以決定，提高所有前線員工底薪，最多加六百。
前線員工凡做滿一年，按年資與表現釐定加幅。代理底薪一般只係五千，若果加足六百，幅度係一成二。至於經理，底薪八千，加幅近八巴仙，都算唔錯。利記現有九百前線員工。
同時，美記執董陳坤興話，公司機制係按月、季或年度，視乎前線員工表現，若果達標又有主管推薦，就有人工加。
代理行前線員工有人工加，唔知後勤幾時至有？
倫敦樓市熱潮維持咗幾年，但好少來港推售，高力國際下周在港推出全新住宅OntarioTower，售價二百八十七萬起。
睇番啲資料，個盤位近金絲雀碼頭，高二十九層，提供開放式至兩睡房設計，三百五十至九百六十呎，計落呎價都要八千零蚊，貴唔貴就睇你點睇。
不過高力話，物業位於倫敦商業中心區，交通方便，出租潛力高。由於未來供應有限，估計倫敦市中心區住宅樓價，每年可升六巴仙至一成。
自由行客嚟香港，目的主要係買嘢，零售業最受惠。自由行客必定幫襯嘅地區，好似旺角、尖沙嘴及銅鑼灣等，舖位已經炒到飛起，租金升到你唔信。
原來其他地區，啲業主一樣諗緊打租客主意，同租客傾加租。
蘭西聽聞，有啲連自由行客都未必會去嘅地區，業主一樣照加租，幅度係兩位數。
呢類舖位，有啲月租都係幾千蚊，實際只係加幾百蚊，但對租客嚟講，係咪好多，真係見仁見智。
淺水灣赫蘭道可以話係南區最少買賣嘅豪宅地段，過去十年，只得九六年一單，罕有度直迫石澳道大屋。
第一太平戴維斯啱啱受業主委託，標售赫蘭道五號全幢六個單位。物業佔地二萬一呎，有四個複式及兩個分層，樓面萬七呎，以每呎兩萬元計，市值三億半。下月八號截標。物業二○○○年頭曾以逾億一內部轉讓。
赫蘭道只有十多個物業，幾乎全部業主都係名人，一號業主係「電器大王」信興蒙民偉、三號屋主係保險界名人鷹星董事總經理施瀚霖、九號大業主係友邦、十一及十四號，則分別由恒基同中電嘉道理家族持有。
電郵地址：
