萬人迷碧咸（DavidBeckham）由於喺上個月對威爾斯嘅比賽時整親肋骨，所以最近多咗時間陪伴屋企人。早前佢就帶咗兩個仔睇網球賽，之後又全家一齊同巨星湯告魯斯（TomCruise）欣賞皇家馬德里嘅賽事，日前他同家人又喺保鑣陪同下，去咗馬德里公園遊玩。另外，佢早前接受訪問時話，重未放得低曾經着老婆底褲一事，重問自己當時究竟喺度做緊乜嘢。
碧咸當日孭住五歲大的大仔布魯克林（Brooklyn），老婆Victoria就抱住兩歲嘅羅密歐（Romeo），一家人喺一群保鑣保護下漫步到公園。碧咸一路上孭住布魯克林都好輕鬆自在，相信佢肋骨嘅傷勢已經無大礙，好快可以再踢番波。
而碧咸早前接受訪問時話，佢退休之後無意做球會管理層，反而有興趣起足球學校，佢又承認重放唔低以前着沙龍同老婆底褲嘅事，佢話：「我對所做嘅事唔會後悔，但當你回望十年前，你會諗『究竟我當時做緊乜』。」
此外，有咗BB五個月嘅Victoria原本一百一十磅，但近日因為係咁食零食，體重暴增咗十四磅，但佢啲朋友反而覺得Victoria靚過以前，而且佢重識等放鬆自己，盡情享受生活。另外，Victoria又表示唔想俾人睇到底褲條邊，所以唔鍾意着底褲。