香港經濟正在復甦，負資產及破產宗數大幅減少，但渣打（2888）竟然大派200封大信封，隨即令人對銀行股起戒心，因為不知事件是否意味銀行經營環境比市場預期為差。滙控（005）跌0.75%至131元收市，渣打曾大跌3.7%至142元，但最後有驚無險，平收147.5元，恒生（011）跌0.46%，收報107元。
其實香港銀行服務一直處於轉型，如果有去開銀行，都知道要獲得櫃員服務就要排長龍，但如果想買基金或進行投資，就大把職員招呼你。
講到尾，銀行要多做賺錢服務，唔賺錢的服務就少做，唔能夠跟隨銀行服務轉型的員工，當然難逃被裁命運，現實就係咁殘酷。
御泰國際（155）配股後噚日復牌，股價大升77.77%，收報0.08元。同系的御泰金融（555）亦一度升25.8%至0.039元，但最後鑊氣全消，收報0.031元，冇起跌。
市場一直傳御泰國際及御泰金融賣盤，但今次只得御泰國際配售擴大後股本的15.93%新股，集資1290萬元，而非發新股引入單一大股東，消息其實令人失望。但黑客聽到今次配股只是賣盤的前奏，所以噚日先至炒到㷫烚烚。
盈大地產（432）噚日勁升10.42%，收報2.65元，成交金額高達2.64億元。雖然盈大就快公布機樓重建項目，但照計不足以刺激股價升得咁勁。
e莉莎話，盈大早前配股，股份大多落入友好人士手上，所以對今次股價炒高並不奇怪。不過，有口痕友就話，呢期濠江概念當炒，盈大或者會進軍濠江豪宅市場，為股份增加炒味。
阿虎