潮界經紀大隻標啲料果然準確，早幾日話朗豪坊西武如期11月頭開幕，果然冇錯，其實大隻標曾經提及過西武會請埋國寶亮晶晶剪綵，不過唔敢100%肯定，所以叫我唔好寫住，大隻標確係厲害。雖然已轉秋涼，但大隻標頸上仍搭住BeamsBoy毛巾，一副街頭型人模樣，一身「嘻哈」動作繼續講朗豪坊：「其實業主已經Confirm今個月17號對外開放，到時已裝修好啲舖就可以開張大吉，而起租期亦都傾好咗，唔會由月頭起計，呢個發展商確係有良心，並冇大石笮死蟹！我個老友兆萬『超人王』亦會喺朗豪坊9樓開多間分店，試吓開拓新客路，呢個場真熱鬧！而早排好多水貨舖咪話會搬去朗豪坊嘅！好多人懷疑佢哋點交得起租？其實個場會有個特別平租Area，主要租畀利時、潮特啲小本經營潮流舖，等佢哋用啲時下流行水貨吸引後生客；聽聞水貨大亨袁仁祥就喺嗰度插旗，不過祥哥話唔係貪嗰度平租，只不過覺得嗰度形象適合喎，哈哈！
「亦有人話專扮日本正宗Porter嗰間『波打國際』會喺嗰度開舖，但SoFar咁耐我又冇見過佢哋蹤影。講開『波打國際』，呢個牌子來自台灣，並非我哋去開日本買開嗰隻Porter，所以價錢自然平成截，如果朗豪坊有呢類舖頭，怕且有啲格格不入喎！」
主持人：大食Jack
八卦熱報：
