內地雜誌《參花》喺前年登咗一篇名為《誰把劉曉慶送進監獄》嘅報道，劉曉慶之後嬲到要告呢本雜誌，但最莫名其妙嘅，係佢竟然連武漢市武昌區嘅一個報販徐婆婆都要告埋，原因係徐婆婆嘅報攤度擺賣呢本雜誌，徐婆婆家陣已經七十歲，全國咁多個報攤賣呢本雜誌，劉曉慶淨係捉住呢個老婆婆嚟告，真係令人反感。
徐婆婆收到告票後梗係嚇咗一跳，因為劉曉慶要佢賠償十九萬六千蚊人民幣，其實劉曉慶係早有預謀，徐婆婆啲家人話因為劉曉慶想告本雜誌，佢為咗證明呢本雜誌係受到廣泛傳播，咁唔好彩徐婆婆俾佢揀中，劉曉慶搵人去徐婆婆嘅報攤買嗰本雜誌，重要徐婆婆畀出一張有蓋章嘅收據，於是順理成章呢張收據就成為劉曉慶告徐婆婆嘅罪證，真係幾冤枉。好彩上個禮拜三開審，法院裁定徐婆婆同呢件案無關。
根據李連杰嘅個人網頁所講，李連杰將會同憑執導恐怖鬼片《娃鬼新娘》而喺荷李活打響名堂嘅香港導演于仁泰合作，拍攝一部武俠片，雖然部戲重未改名，不過個故事會講大俠霍元甲嘅一生，而據知呢部戲將會喺下年三月至七月喺內地拍攝。
國家金牌跳水情侶田亮同郭晶晶，近排成日拍拖出席唔少公開活動，噚日佢哋又喺上海出席一個鑽石宣傳活動，郭晶晶着咗一件吊帶裙，外披皮草，充滿貴氣，佢同男友田亮肩並肩進場，不過就冇接受現場記者採訪。
李亞鵬同王菲嘅戀情曝光後，即成為傳媒焦點，噚日內地有報道指，李亞鵬同朋友喺上海合資租咗一座老劇院，經改裝之後，李亞鵬就做酒吧老闆。原來早前呢度舉行嘅時裝騷，李亞鵬係座上客，據知當時佢已經租咗呢座老劇院。
林峯同佘詩曼噚日喺天水圍為無綫新劇《YummyYummy》拍外景，有指鄧萃雯係唯一女藝人，獲無綫找贊助出席台慶盛事，阿佘就話：「公司都有問過我使唔使搵贊助，但我已經搵咗人做衫。」
另外，林峯日前玩跑步機暈咗，又話如廁時屙血，𠵱家成日被人取笑，佢對此好無奈咁話：「當宣傳囉！𠵱家多咗朋友，但個個都笑住嚟慰問我，好似陳鍵鋒同吳卓羲，就連監製都笑我。」
孫燕姿最近發現有人冒用佢個名，指佢會喺台灣舉行「孫燕姿聯合十校演唱會」，有歌迷透過網上買飛俾人呃錢，唔少高中同大學生即刻打電話去唱片公司查詢。孫燕姿同所屬嘅華納唱片公司立即否認，佢哋希望歌迷小心咪俾人呃。
