四十五條關注組四大狀開始要落實參選時承諾，實行牙齒當金使，話專注公平競爭問題嘅湯家驊噚日就交出第一份報告書，話好快有第二份同第三份。
唔講唔知，原來公平競爭呢一科係湯大狀強項，因為當年佢喺英國牛津，就係專攻呢門，可惜返港之後，英雄冇用武之地，今次正好用得着，湯大狀當然希望多啲向公眾解釋，竟然一度異想天開提議，設立一條二十四小時熱線，接受市民投訴，但係即時畀助理否決咗。梗係啦，班助理要搜集世界各地資料寫報告書，又要做埋政改，鐵人都唔掂。
不過湯狀滿口一號、二號報告書，令坐喺旁邊嘅余若薇突然諗起林瑞麟，成日講埋啲「×號報告書」嚟推搪幾時普選，余若薇講講吓，玩埋激將法，問湯家驊明年交最後報告書，可唔可以快過林瑞麟交五號政改報告書嘅時間？真高招。
（圖）余若薇笑笑口叫湯家驊要快過林瑞麟交報告。
傳真︰2623-9278
電郵︰