經紀陳果然冇估錯，前日急升的大華國際（600）真係計劃洽商參與港澳相關酒店項目。不過，大華噚日升勢未能持續，最高見過0.247元後就無以為繼，最後跌0.42％，收0.235元。
家陣好多人都話去澳門投資酒店，講親酒店就自然憧憬入面會有賭場，睇怕大華都唔會例外。
經紀陳同小初講，稍後會愈來愈多二三線股走出嚟話要去澳門投資，情況就如當年科技熱潮一樣。小初當然同意，皆因潮流興咩嘢，大家就會一窩蜂咁去追，呢啲向來都係香港人嘅特色。
另外，早幾日小初去到旺角，發覺好多人排隊買電器，原來係國美電器（493）有促銷活動。經紀黃話，自從上次國美大股東以每股3.98元減持舊股，好多芬佬都要咗貨，刺激股價勁升，𠵱家愈嚟愈多機構投資者留意國美，所以股價非常硬淨。
經紀黃重話，有個別證券行睇好國美，出報告將目標價定到8元。國美噚日升3.31％，收6.25元，成交金額4072萬元。
慕容小初