未來發展寄厚望<br>股路縱橫:中信資源現突破

未來發展寄厚望
股路縱橫:中信資源現突破

港股周一走勢反覆,但都能以升市收場,恒指報13561,升66點,成交169億元。藍籌股基本上係由滙控(005)支撐大局,其他榮辱互見,估計恒指上到呢個水平,調整壓力會愈來愈大,但由於不斷有資金流入,即使係調整,幅度亦唔會大。
國指收4661,升19點,主要係升保險股同兗州煤業(1171),其他嘅弱勢都未除,暫時未有接力而上的徵兆。不過,人民幣升值的憧憬對股市始終係利好因素,只要加息影響過去,國企就會再展新升浪,以現時平均PE約6至8倍計,未來股價還有頗大上升空間。至於二三線股,有消息者繼續成為熱捧對象,中信21世紀(241)搶上2.775元高收,又升6.7%;同系的中信資源(1205)亦高收1.49元,更升7.2%。
雖同屬中信系統,世紀21係電訊服務旗艦,而中信資源則係資源業務旗艦,前者近大半個月來升勢好急,由1.40元一路升到2.80元,足足升了1倍,中信資源則在整固完成後,噚日先開始真正發力,今次破位而上,而又有2260多萬股的大成交配合,短線量度目標指向2字頭。

傳獲石油經營牌
中信資源消息同21世紀一樣咁勁,聽聞會攞到中國第4個石油經營牌照,亦都會係最後1個,家吓3個經營者分別係中石油(857)、中石化(386)同中海油(883)。另外,中信資源日後好大機會同外國石油企業合作,在內地發展石油批發同零售業務。
中國經濟起飛,石油市場龐大,中信資源呢方面發展絕對可寄以厚望。
銀建國際(171)係噚日市場嘅焦點,因為佢嘅成交大增至7.6億元,僅次於滙控而排第2位。
銀建獲得花旗銀行入股,早段股價故意示人以弱,但午後已按捺不住,搶上3.775元的全日最高價收市,大升15.2%。
花旗「大拿拿」攞8億幾銀出嚟,必有後着,銀建亦如虎添翼,日後唔好話處理幾百億元嘅不良資產,就算一千幾百億,有花旗幫手,肯定事半功倍。有人擔心發新股會攤薄盈利,但如果生意有更大發展,盈利增長以幾十個巴仙計,對公司只會更為有利。
郭兆誠