特首學人做和事老 - 李八方

  特首學人做和事老 - 李八方

呢輪中台關係好似熱爆,唔知係咪真係會喺明年開拖,中國長期罔顧台人感受,而阿扁成日要去中國化,雙方毫無溝通基礎。至於老董,好似想學人哋李光耀客串吓做和事老,噚日喺辦公室同到訪嘅「中國統一聯盟」一行見面,講吓香港落實一國兩制嘅成功經驗喎,不過,呢個「聯盟」根本係一個親中外圍組織,老董自說自話。
老董十月喺立法會下令要各司局長級官員要上港台周融個節目開咪,終於噚日成事,民望排頭位,但係俾好多小巴司機問候娘親嘅廖秀冬打頭陣,當然冬冬上任以來,究竟做咗幾多實事,定係流眼淚表演女人味最叻,市民心中有數,減交通費八方第一個舉手贊成,但係講容易,做難。
冬冬開咗個頭,其他局長就冇得話唔去,下個星期一輪到孫公,佢阿哥身經百戰,更加冇有怕。
(圖)特首董建華(中)會見訪港嘅台灣「中國統一聯盟」。政府新聞處圖片


傳真︰2623-9278
電郵︰[email protected]