唐唐特首熱身表演，明年財政預算案，今年未完就搶先「諮詢」，即是將個波交畀六百萬香港人，將來衰咗，由香港人去孭鑊，若然成功，邊個攞彩？盲嘅都睇到。
唐唐表演重要項目，就係要開銷售稅。應唔應該開銷售稅呢？消息人士聲稱，話中方對𠵱樣嘢都好有保留。昨日某大左報以頭版頭條巨大篇幅，藉滙豐銀行中華區業務主任把口，大字標題話特區「內憂外患」加劇：內憂，即是經濟結構問題重衰過九七嗰陣時，不但轉唔到型，重更加倚賴飲食及零售消費。而外患，就係大陸沿海城市迅速崛起，香港喺金融、物流、管理、服務等各方面「優勢」，遲早會俾大陸追越！
中央人民政府可以「幫」到特區嘅，只不過係開閘放人，畀自由行湧落嚟，養住尖沙嘴銅鑼灣一大棚金舖、酒家同酒店。莫講上海北京同珠三角，胡溫冇可能㩒得住大連、青島、寧波、溫州、廈門，叫呢啲二線城市唔好上位上得咁快，威脅香港嘅「優勢」。老董力竭聲嘶，一度高喊嘅「知識型經濟轉型」及「高科技港」，咁多年一直得一團口水花，同埋一個桔，特區成班億萬富豪「工業家」，一邊上北京食國宴，排隊爭位影相就叻，落返嚟香港，就幫口大罵民主派冇建設性，佢哋啲工廠，就一直留喺東莞深圳，打死都唔搬落嚟！
香港冇實業，就冇技術勞工，亦冇經濟轉型。香港做嚟做去，都係飲食零售，資金全部北上，剩番喺香港嘅，得一堆泡沫同鑊鏟。大陸佬自由行落嚟買金鑽、食魚翅，貪香港啲金鑽係真嘅，魚翅唔會食瓜人，好嘞，咁你唐唐呢頭又徵收銷售稅，一係到時羅湖車站，人頭湧湧，每日有幾萬個自由行大陸佬揸住貨單，喺入境處出關口，爭住回水退稅，一係就搞到啲金鑽魚翅再貴多兩成，咁大陸佬就轉移陣地，落去泰國掃貨！
經濟轉型無望，靠消費養命，唐唐又要喺消費嘅生命線同佢開刀放血。咁樣熱身表演，向阿爺交功課，阿貓阿狗唔識咩？唔怪得連土共老左都睇唔順眼，用頭版發炮，喝住董唐咪亂嚟囉！
傳真︰2623-9278
電郵︰