無風無險，恒指又漲66點，當中有54點係滙控（005）所帶挈嘅。滙豐銀行存息再減，銀行賺多啲係其次，存戶收利息似有還無，提款攞嚟買股票嘅話，如選擇銀行股，多數係揀滙控，唔通走去買永隆（096）咩？
滙控又啱啱宣布派發季息0.13美元（去年同季0.12美元），更加啱晒。睇嚟，滙控股價稍作停留一吓，又會新高之後又新高。
滙控C輪：滙控升1.50元，C輪跟貼嘅話升15仙，但當然冇可能隻隻跟足，各輪表現參差。90仙以下大槓桿率嘅C輪中，9848升15.5仙，突少少章；2253升13仙，跟得好貼；4440與4441分別升9仙與6仙。
最墮後嘅係4445，只升得4仙，收60仙。呢幾日，4445升得最慢，有接近7個月壽命，槓桿率又有22倍，完全冇溢價，𠵱家最筍係呢隻。
中移動C輪：中移動（941）跌10仙，收23.40元。大市要好，唔會冇中移動份，搵隻C輪短炒可也。
中移動C輪，數據最靚嘅係9813，壽命稍嫌短些少，唔夠1個月，輪價25.5仙，勝在溢價得0.1%，槓桿率有9.2倍。既然平水，唔使理有效槓桿率與引伸波幅。
章盛