台灣組合F4成員吳建豪近日忽然去咗內地嘅嵩山少林寺，重拜寺中方丈釋永信為師，法號言來，做咗寺中首位嘅藝人俗家弟子。
吳建豪其實喺一個禮拜前已經去咗少林寺，前日佢着住成套功夫衫，同助手喺兩名少林武僧引領下，拜見釋永信方丈，釋永信話吳建豪好嚮往少林文化同少林精神，所以佢好珍惜呢次做俗家弟子嘅機會，佢練功時表現得好認真同刻苦。由於吳建豪性格開朗，喺寺中廣結人緣，同唔少武僧都好friend㖭。助手又透露吳建豪大概喺下個禮拜就結束訓練，但以後每年都會嚟少林寺探望方丈。
上個月有台灣報道話吳建豪同緋聞女友徐若瑄分手，原因係徐若瑄𠝹仔，初時馮仁昭重以為吳建豪受感情困擾而去做俗家弟子，但噚日有內地報道話因為荷李活將開拍一部講述少林題材嘅電影，吳建豪至嗱嗱聲拜師學武，希望以少林弟子嘅身份爭取角色！
吳建豪咁用心良苦，就睇佢際遇如何啦，不過唔知佢喺少林寺學藝期間，會唔會有機會練吓鐵頭功同金剛腿呢？
林心如聽日會出發去紐約遊學，但聽講蘇有朋嗰段時間都會去外地旅遊，咁佢哋會唔會異地相遇呢？林心如話：「已經很久沒跟他聯絡了，看報紙才知道他也要遊學，不太確定他會去哪裏，應該是倫敦吧。」林心如話自己都有閃電結婚嘅打算喎，佢話：「我不喜歡外國人和姊弟戀，唯一可以接受的是黃種人或混血兒。」
陳霽平噚日喺金鐘出席公開活動，佢話最近忙於為台慶排舞同拍攝新劇《YummyYummy》。陳霽平憑《金枝慾孽》寶嬋角色而有份角逐「飛躍進步女藝員」獎，但佢認為自己演技尚待磨練，攞獎一定冇佢份，反而睇好郭羨妮攞呢個獎多啲。
鄭浩南太太Ailyn前晚入院生BB，諗住可以等待BB女自然分娩，點知可能初為人母心情特別緊張，直至噚日下午，終於決定剖腹生產，成功誕下囡囡鄭喜文，而身為老公嘅鄭浩南，一直陪伴住老婆，重拍低成個過程，等將來可以重溫。
無綫劇集《金枝慾孽》珍藏版DVD日前面世，推出後一掃而空，有唔少地方更炒賣至千六蚊，無綫聽過發行商同零售商意見之後，決定加印二千套DVD，大約兩星期後就可以推出。馮仁昭收到風話原本無綫都想加印多啲，但話明珍藏版嘛，太多就會失去咗意義。
黎燕珊噚日喺金鐘出席環保美容活動，佢話睇有關一男子攬仔跳樓單新聞好感觸，事關佢離婚嗰陣亦曾經諗過喺地鐵跳落路軌自殺，但好彩得到朋友開解至冇咁做！黎燕珊話：「唔開心嘅事，諗吓其他嘢就會過，人最緊要係逆境求存。」
