人怕出名豬怕肥，有「新比利」之稱嘅巴西新星羅賓奴，由於呢排鬼咁紅，一時又話英超聯嘅車路士要佢，跟住又話已經同意加盟西甲嘅皇家馬德里；結果，佢嘅媽媽瑪蓮娜就喺上星期六俾兩名持槍男子擄走咗，𠵱家都仍未有音訊。
據巴西警官托拉沙話，瑪蓮娜係喺上星期六家庭聚會嘅燒烤會中，被持槍賊人擄走嘅；而兩名賊人重將其他人鎖晒喺廁所，等佢哋冇得追出嚟。不過，賊人至今仍未同羅賓奴家人聯絡，未知佢哋想點，但睇嚟都係想勒索。二十歲嘅羅賓奴知道消息後，冇晒心機，重暫時唔為球隊山度士踢波住。
唉！南美治安一向都唔好，綁架勒索球星嘅親人不時都會發生，所以之前巴塞隆拿話睇中咗阿根廷嘅神童拉美之後，拉美嘅媽媽就猛叫巴塞唔好得個講字，快啲接佢哋同拉美走人。睇嚟，拉美嘅媽媽真係有先見之明。
羅馬前晚迫和AC，戰果理想但唔代表軍營氣氛好。話說迪維基奧難得踢正選，點知隊波一開始就俾AC壓住打，為咗頂住卡富，佢上半場廿分鐘左右就俾新丁迪馬天奴入替，冇晒面。睇佢離場時燶口燶面，重對住教練迪尼利口噏噏，擺明唔妥，希望呢個衝突唔會鬧大啦。
排西甲尾二嘅馬略卡終於要招兵買人救亡，決定向日本招攬新人，借咗大阪櫻花前鋒大久保嘉人過檔，希望解決球隊入球荒問題。自從去年洲際國家盃後，一直有傳「快馬」大久保嘉人最有機會到歐洲球會搵食，前人城彰二同西澤明訓過到西甲都冇表現，睇吓今次會唔會突破到。
紐卡素日前主場一比四慘敗予富咸，正選門將基雲突然變咗由夏柏出任，結果呢位長居後備嘅門將俾人四度破門。我求大俠賽後求證基雲為何突然缺陣，原來佢太座比賽當日臨盆，基雲做第一任老竇自然緊張，決定請假。對夏柏嚟講，有機會踢正選卻大敗，真係唔多夠運囉！
早排先到同拓荒者簽咗一張過六億港元合約嘅NBA拓荒者主力蘭度夫，噚日因為瞓過龍，誤咗飛去多倫多比賽嘅班機，俾球會罰錢，佢事後嘅解釋係鬧鐘冇響。蘭度夫身為球隊靈魂，又𢭃老闆咁多人工，鬧鐘唔響唔能夠成為藉口；佢應該學吓人，用兩個鬧鐘作為保險。