立法會選舉結束咗都快近兩個月，選舉結果早就塵埃落定，但選舉時發生嘅種種混亂，就重未有人認頭負責。據聞，選管會主席胡國興大法官呢兩日就要向特首交功課，提交中期選舉報告書，可能政府聽日就會公布。究竟胡官會唔會喺報告書中，堅持話票站人員用間尺、甚至燒烤叉伸入票箱壓低選票，係「醒目」嘅做法，又抑話有人要被紀律處分，好快就有分曉。
上個月尾立法會議員吳靄儀提出成立獨立調查委員會，調查選舉混亂，就係以一票之差被否決，當時政府同親中議員嘅理據，係話中期報告書十一月中就有，最後報告就要喺十二月，最好等埋份選舉報告書出咗先作定奪。
特首辦同選舉事務處都話，呢兩日就報告書一事會有公布，大家可以打醒十二分精神。政府消息人士話，今次特首睇完份報告，一定會就選舉混亂一事作出正式回應。
傳真︰2623-9278
電郵︰