澳門賭業概念股持續降溫，除咗新濠國際（200）外，唔少之前熱炒的股份如遠東發展（035）同埋嘉華建材（027）都繼續有獲利回吐。澳門實德（487）在搞完遷冊同埋股本重組後停咗牌幾日，並於今日復牌，隻股停牌之前升得相當急，唔知今日會係乜嘢光景。
經紀陳話，市場傳聞澳門實德可能在今日復牌之際，順便公布落實投資1億美元嘅澳門十六浦主題公園計劃，之後或者會順手批埋股。
澳門實德現時主要持有一艘郵輪權益，睇落就比較奀，除非搞注資，否則都好難在一時三刻壯大。早排隻股已經周圍去路演，投資者對佢應該唔陌生，若然新搞嘅生意得到認同，相信搵人投資間公司唔係難事。
另外，噚日大華國際（600）突然急升21.64％，市場傳公司可能染指濠江賭業，雖然小初覺得係吹水亂講居多，但經紀陳就話大廚向來緊貼潮流，就算消息係真，佢亦唔覺得驚奇。大華噚日收0.236元，成交金額300.9萬元。
慕容小初