張文慈及吳廷燁這對緋聞男女，昨日齊齊於清水灣發生車禍，事緣張文慈駕車在影業路被尾隨的房車碰撞，及後吳廷燁駕車經過，竟因心急救佳人而未有拉緊手掣停下新款MiniCooper在斜路邊，最後這對緋聞男女一起目睹MiniCooper溜前撞向欄杆。
張文慈、萬綺雯、吳廷燁及林韋辰等昨日於清水灣片廠出席亞視新劇《爸爸兩邊走》的拜神儀式，但張文慈駕車於片廠對出的影業路準備右轉之際，不幸被尾隨的房車撞尾衝前，幸好沒有人受傷。而剛巧駕車經過的吳廷燁眼見張文慈撞車，即下車協助對方及等候警員，但吳廷燁離車時未有拉緊手掣，愛車MiniCooper沿斜路溜前撞向欄杆，變成兩宗交通意外。
張文慈慘被撞車尾驚魂未定之際，又目睹吳廷燁的車撞欄，她說：「好似拍緊戲咁，佢架車重係新款，揸咗唔夠半年，我覺得好唔好意思。
「其實我哋原本傾得七七八八只係等差人嚟，點知吳廷燁架車又突然向前溜，真係好對唔住佢，我會津貼三千蚊畀佢整車，等陣真係要好好咁拜神。」
不過吳廷燁對於張文慈打算津貼自己修車時，他說：「唔使喇，佢請我食餐飯就得，最多陪多我一晚喇。」他續說：「都發生咗，冇話怪邊個，都係自己疏忽，可能見到佢發生意外，自己緊張得滯未拉緊手掣，已經算係不幸之中嘅大幸，好彩有彎位，如果直衝成架車就要報銷。」
而原先張文慈以為愛車只是被撞揼把，但她準備開車離開時，座駕有怪聲，惟有召拖車拖走。及後《爸爸兩邊走》眾藝員得知二人發生交通意外均表關心，林韋辰更笑指他們為「苦命鴛鴦」。
採訪、攝影：王崇穎
