順豪資源上月底以兩億八，將中環荊威廣場六層商場，賣畀舖王「波叔」鄧成波，噚日又委託戴德梁行，標售中環順豪商業大廈全幢，今個月三十截標。
聽講，有兩個買家傾得好埋，代理好有信心賣得出，所以標期較短。呢幢八七年起好嘅寫字樓，市值兩億八至三億，樓面五萬四呎，每呎五千幾，以乙級寫字樓計，似乎貴咗啲，不過，因為有近七千呎舖，所以拉高估值。
順豪主帥鄭啟文，近年喺投資市場頻有買賣，早年賣出山頂賓吉道地盤，再買入北角英皇道酒店地皮，今年四月再買入西環明珠豪庭酒店，近月連環沽售兩項中區核心收租物業。話唔定，短期內又再大手入市。
一手市場暫時未有中高價盤開賣，盈大豪宅薄扶林貝沙灣，趁空檔推出第三期南灣第八座應市。聽講，盈大今晚宴請地產代理，喺售樓處大快朵頤，趁秋風起，食蛇宴，主要目的自然離唔開推介新盤賣點。
呢一座，最細碼單位八百二十五呎，意向呎價至少八千，入場費估計六百六十萬左右。
通常盈大推盤，慣例舉行名人晚會後落實交易，今次應該唔會例外。
市場人士話，貝沙灣二手上個月非常旺，有成七十宗。港置夏笑笑話，一期八座高層A，近千七呎，以逾千四萬連兩個車位成交，每呎逾八千六。
中區甲級寫字樓，喺投資者積極吸納下，造價飆升，主角梗係要數皇后大道中九號啦！皆因連四叔嘅恒基都出手掃埋一份。
皇九嘅十九樓，早前由銀主標售，上個月底截標，共收五份標書。
原本話以呎價九千成交，點知，債仔永興隆突然唔肯賣，單deal告吹。
永興隆游說到銀行唔賣，睇嚟該廈造價應該有排升。
唔知其他銀主盤，債仔係咪都有機會阻止銀行賣呢？
十九樓有近萬四呎，現分拆為九個單位。
過去周末，一手買賣較前周減少，二手都同步收縮。
三十五個指標屋苑，上星期得百五宗買賣，較前一周少二點六巴仙，連續四周減少。
不過，港島龍頭屋苑鰂魚涌太古城，仍能逆市增加。太古城上周有十一宗成交，比前周增三宗，呎價勁升逾一成，超過五千蚊。港島八個受調查屋苑，僅得鴨脷洲海怡半島成交減少。
另外，上周有五個屋苑冇交投，前周就係三個，當中新元朗中心重係連續兩周食蛋，認真慘情。
電郵地址：
