荷李活老牌女星美亞花露（MiaFarrow）一向致力於公益事業，佢身為聯合國兒童基金會親善大使，近日就去到受戰亂摧殘嘅非洲國家蘇丹，佢帶住十四歲嘅仔Seamus探訪喺達爾富爾地區嘅難民營，重對佢哋嘅處境感到非常震驚。
早排世界衞生組織就曾經表示，達爾富爾自從舊年爆發反政府動亂後，造成一百四十萬村民流離失所，重有二十萬人走難到鄰國查德，聯合國指呢個係全球最嚴峻嘅人道危機。自三月以嚟，達爾富爾地區嘅難民營已經有七萬人死於肚瀉、炎熱同呼吸道疾病等，除非世界各國盡快伸出援手，否則死亡數字會不斷上升。
五十九歲嘅美亞好有愛心，佢有十幾個仔女，其中大部份都係領養返嚟，所以佢見到難民營入面嘅小朋友境況咁悽慘，不禁悲從中來。佢表示自己作為一個母親，覺得好唔安樂，所以希望當地盡快恢復和平，佢又指好多難民同佢講好想返屋企，但係難民營外好唔安全，佢話：「我哋一定要即刻做啲嘢去保障佢哋嘅安全，呢個係最基本嘅人權，而班女性就更加唔能夠離開難民營，因為佢哋一出去就會俾啲暴徒強姦。」