上個星期由大小姐主理的信德集團（242）只係對傳媒略略講咗多少大計，就即刻被叫停，相反其他澳門賭業概念股，就算傳聞滿天飛，股價炒到高一高都好，都冇被叫停牌，真係令人難明。
雖然澳門賭業概念股上周五全面報跌，但經紀黃就仍然睇好信德，佢話公司底子厚，不但澳門概念誘人，其他業務一樣見得人，點都實淨好多。
至於另一隻同樣受大股東注入賭業傳聞刺激，令股價在短短兩個月內，錄得幾倍升幅的嘉華建材（027），近排就唔多覺有人提注入資產一事，反而配股傳聞就揮之不去。
經紀陳話，江湖傳聞話嘉華建材炒到3元水平，就會批股兼搞注資，所以上周嘉華建材炒到上3.20元至3.30元水平時，全世界都觀望緊有冇人做嘢，但結果冇事發生。路邊社消息話，因為隻股走勢靚，所以有人想股價高啲先至搞。
嘉華建材上周五亦隨其他澳門賭業概念股回落，跌6.9％，收3.025元，成交金額1.98億元。
慕容小初