女士們對行街購物興趣濃厚，行足一日都唔覺攰，商場大業主，梗係想招攬呢批消費者。
信和就搶喺聖誕節來臨之前，舉行「女士日」，打一眾女士嘅荷包主意。
信和將本月十四日定為「女士日」，喺大角嘴奧海城商場大搞活動，時裝表演一定唔少得，將城中知名設計師同理大設計系學生，設計嘅五十套時裝，搵嚟名模李嘉慧、陳嘉容，年輕歌手薛凱琪同吳日言等做表演嘉賓。跟住就由專業形象指導、歌手及藝人，好似女版「粉紅救兵」咁，即場幫女士扮靚。
信和集團表示，十一月啱啱天氣轉涼，女士買新衫，意欲特別強。
信和話，最近有大型商場，就港人過去半年嘅消費模式進行調查，發現零售市場嘅重要客源，係年齡二十至三十五歲嘅女性。
雖然蘭西未見過呢篇報道，但覺得信和都幾有諗頭。其實，女士們購物，最緊要係有個藉口啫。商場租戶就肯定得益。
中區及金鐘區，上個月淨係全層甲級寫字樓，都有十三層易手，市況咁活躍，唔少業主都會乘機反價，希望賣高啲。估唔到呢股反價風，已經吹到上環乙級寫字樓，但唔係次次都成功㗎。
中記李百堅話，上環一家貿易公司，有意用每呎兩千蚊以內價錢，買入同區干諾道西一一八號五千零呎單位自用，但交吉單位最大都係得四千零呎，諗住都制。傾妥以千九蚊呎，買入一個中層單位，點知送票畀業主，對方竟然反價兩成，至二千三蚊呎。買家覺得唔值，於是放棄，再喺同區搵過。
個客好快就落實另買京光商業中心五樓全層，面積近六千九呎，作價一千一百八十萬，每呎千七蚊，重平啲。至於原本自用嘅四千呎單位，就計劃放售。
住開西半山，竟然肯搬去將軍澳，原來係因為想住近家人，方便互相照顧。將軍澳南豐廣場一個銀主單位，就喺咁嘅情況下成交。但唔好以為個客屈就，原來佢買入嘅，係一座頂層G複式單位，面積二千零五十呎，購入價六百八十六萬，每呎三千三。
中記徐志強話，買家肯入市，另外嘅原因係有見於地鐵通車後，該區交通方便咗，同區又少特色單位供應，升值潛力強。單位上個禮拜至放盤，喺短時間即獲承接。
講開南豐廣場，早排有批銀主貨，透過拍賣方式出售，為數共六個，聽講，銀主係南豐財務。
地產代理兩大陣營，呢邊有中記與利記，嗰面係美記加港置，多年嚟一直包辦發展商一手樓代理，其他代理行，就算有客，都要透過兩大集團轉介。不過，世紀21近年開始冒起，唔少新盤都可以做代理。
恒基重推中半山麥當勞道11號，上個禮拜六搵齊中原、美聯、利嘉閣、港置同世紀21高層，傾吓點樣推銷個盤。
恒基營業部助理總經理林達民，之後重同五大行高層齊齊影張大合照。
睇嚟，一手樓代理有趨向三國鼎立之勢。
萊坊國際嘅住宅季刊創刊號剛面世，取名《選宅》，裏面嘅文章，指市民對經濟信心恢復，失業率回落，以及投資者湧現。
萊坊相信豪宅價格，年底前有條件再升一成，山頂與南區優質住宅，造價預料高見三萬蚊一呎。
另一方面，唔少私樓業主將單位轉租為賣，搞到豪宅租盤減少，業主已經收窄議價空間。
當然，季刊唔止淨係講吓市道就算，目的係推介本港同海外樓盤，所以附有唔少靚靚嘅樓相，有啲重有埋租售價錢，等啲客睇啱就搵佢哋。
電郵地址：
