呢日到半島酒店參加酒會兼晚宴，離開時已近晚上十時。半島酒店生意好好，大堂坐滿人，繁榮場面似乎逐漸恢復九七之前。不過有一件事係以前冇嘅，就係接待處對開，有幾位靚女排排坐，衣着非常性感，說話一聽就知係表妹口音。左丁山望多一眼都唔敢，急急腳就行。
次日碰到一位退休警官，同佢講起，佢話：「唓，有乜咁奇，有一晚我哋成班老差骨，有退休，有現役嘅，在尖沙嘴地鐵站上面嗰間老牌酒店食飯，食完有人提議去酒吧飲番杯，一行入酒吧就見到近二十個年輕貌美靚女坐喺裏面，一對外籍老夫婦入到去望吓望吓，卒之唔敢坐低，走咗。我哋班人，一睇就知道係乜嘢一回事。但一來咁多靚女坐埋飲酒，並非犯法；二來我哋怕俾傳媒狗仔隊影相，話我哋在酒店酒吧與靚女為伍，影響警隊聲譽，於是又立即鬆人。」
鬼佬羅試過一星期內於黃昏時間在金鐘五星酒店連續撞到一位靚女。靚女跟埋佢入𨋢，重問佢：「What'syourroomnumber?」鬼佬羅連忙講：「我要去停車場。」隔咗兩日，同一酒店、同一時間，鬼佬羅與朋友傾完偈之後，入𨋢去停車場攞車，呢位靚女居然又閃咗入嚟，鬼佬羅望都唔敢望佢，因為老婆已經在繳費處等緊佢，靚女見鬼佬羅雙眼向天，哼咗一聲，出𨋢而去。
鬼佬羅話：「自由行唔見帶旺我啲餐廳生意，反而帶咗好多靚女落嚟。」呢類靚女，經常出沒於五星酒店之間，尖沙嘴最易碰到，單身鬼佬入酒店，就係佢哋心目中嘅最佳狩獵對象。