洛賓連續兩場替車路士奠勝，同嚟自荷甲球隊嘅阿仙奴尹佩斯比較，風頭更勁，「車仔」冇咗梅度，唔愁前鋒線唔夠人。
車路士領隊摩連奴賽後有讚洛賓，但奇怪就係佢重申洛賓唔係佢羅致，（查實係雲尼亞里喺曼聯手上搶佢返嚟），唔係佢嘅責任，不過當然唔介意呢位荷蘭翼鋒係車路士球員；我求大俠就話𠵱家杜奧巴未傷癒復出，又開除咗梅度，有洛賓同杜夫兩位翼鋒爭取士哥，唔使古莊臣咁辛苦。
話時話，梅度自從同車路士分手後唔愁無出路，有傳梅度有機會喺兩、三星期之內簽新球會，據聞阿仙奴同保頓等英超球會對佢好有興趣。
而羅馬尼亞教練艾奧丹斯古希望請梅度做助教，停賽期間協助國家隊訓練，重呼籲羅馬尼亞球迷重新支持佢，都算唔話得。
巴塞隆拿傷兵名單愈來愈長，前晚對拉科又有比列堤扭親腳，諷刺嘅係，比列堤當時並非被對手踢傷，而係俾塊草皮跣親；加上傷兵名單其他主力嘅加比、施雲奴、艾美臣及莫達，全部都係喺主場賽事受傷㗎！睇嚟佢哋可以試吓好似中國人咁，拜吓魯營球場個土地公公！
本地球圈近排有唔少喜事，繼港隊長李偉文上個禮拜小登科後，噚日又收到南華左翼陳志康嘅喜訊；佢話愛妻啱啱響中午十二點生咗個囡囡，母女平安，求大俠自然要恭喜佢。康仔今季響南華表現唔錯，前日兩次助攻幫球隊贏公民，唔知有冇機會重返港隊響世盃外圍賽對中國呢？
羅馬前鋒卡斯辛奴雖然好波，但紀律極差，喺上星期二歐冠盃前已被貶為後備，點知佢唔識死，球會多次約佢傾紀律問題，佢都玩失蹤；羅馬忍無可忍，喺上星期六宣布無限期將佢喺一隊停賽。雖然羅馬唔認會賣佢，但既然卡斯辛奴有市場又難搞，我求大俠都建議羅馬賣走佢。
比利時球隊安德烈治喺今屆歐冠盃表現麻麻，喺G組四戰全敗包尾，球員梗係受到批評啦！唔知係咪因為咁，喺佢地上星期六主場反勝拉路維爾二比一時，中場巴斯治奧追和一比一嗰球，就射爆波！可能巴斯治奧最近受埋嘅冤屈氣，所以喺禁區邊怒抽時個波應聲爆咗！