女生宿舍成員、無綫高層梁家樹愛女梁靖琪（Toby）舊年加入娛樂圈嗰陣，得到師兄蕭正楠照顧，馮仁昭聽聞佢哋之間一早互有好感，五月嗰陣佢哋喺常平合作拍攝網劇《探偵學院》時，蕭正楠同Toby更低調發展地下情。
據知，蕭正楠只係客串嗰套網劇，佢留喺常平開工嗰個禮拜，同Toby嘅感情突飛猛進，之後經理人安排佢哋有唔同嘅工作，蕭正楠要飛北京拍劇，而Toby同其他女生宿舍成員就留港宣傳，一對小情人異地分隔，只得靠電話傳情。
蕭正楠同Toby前晚有機會一齊喺上海出席反盜版演唱會，佢哋兩個一於寓工作於娛樂，馮仁昭一位內地記者朋友重見到佢哋不時出雙入對，態度親暱，咁又係嘅，冇見成幾個月，對於啱啱拍拖嘅小情侶嚟講，點會唔係有小別勝新婚嘅感覺呢？
許志安噚日喺中環出席《香港步步創高峰——決戰國金》活動，而安仔近排頻頻為佢同葉德嫻首合唱新歌《美中不足》做宣傳，成績唔錯，首歌除咗成為卡拉OK熱唱歌之外，重喺港台「中文歌曲龍虎榜」連續兩個星期上榜首，安仔話要訂做一塊用金製成嘅曲奇餅，送畀葉德嫻慶祝有好成績。
曹敏莉喺無綫台慶，即十九號嗰晚會表演跳舞，呢排一有時間佢就開始操練，佢今次會同林峯、廖碧兒一齊拍檔跳舞，有記者問佢會唔會同林峯跳辣身舞，佢就話：「梗係冇啦！我哋跳嗰啲都係大路嘅舞。」曹敏莉重話早排太得閒，食得多，所以有啲水腫，但呢排開番工，個人自然冇咁腫。
陳啟泰噚日去咗鑽石山荷里活廣場，出席香港肝壽基金舉行嘅「惜肝樂聚嘉年華」，佢被委任「護肝大使」，任期兩年。陳啟泰話：「香港人好多患乙型肝炎，情況好嚴重，而且好多人唔注重衞生，成日喺街邊買嘢食。我好注重健康，亦有睇另類醫生，例如氣功醫生，我自細托賴冇乜大病，食嘅係健康餐單，不過我唔係食好多菜，醫生話菜唔係咁啱我食，個個人都唔同。」
白嘉倩噚日出席美的概念纖體公司嘅宣傳，該公司特別揀了十對母女或姊妹參加減肥比賽，白嘉倩成功由二百四十幾磅減到一百五十磅，佢話理想體重係減到一百四十磅，但到時都唔敢着三點式影相，佢重話𠵱家借阿媽啲衫着住先，等減多十磅之後，先至換過晒啲新衫獎勵自己。
鄭少秋（秋官）日前接受港台訪問，秋官喺訪問入面講到𠵱家同肥姐（沈殿霞）關係都唔錯，佢重話好感激肥姐咁多年嚟對欣宜照顧得咁好，不過講起當年佢哋離婚嗰陣，佢就話當年將香港同加拿大嘅屋都留咗畀肥姐，當時佢只係淨番十幾萬喺身。
不過𠵱家秋官嘅經濟當然冇問題啦，佢又話唔覺得自己捱得好辛苦咁話。
