上周五美股有勢。期油收3點半，桶價仍升0.79美元，但美股收5點，杜指仍升73點，當油價上升冇到。咁嘅勢，美股有機更上層樓，帶動港股向上。
和黃C輪：恒指𠵱家13494，已經高過10月初高位13398，亦較9月初高位13190高出超過300點。和黃（013）比較脫腳，現價60.75元，低過9月初63.25元高位幾多吓，隨時跟大隊上返去，炒追落後。恒指挾上去，和黃亦係好使好用嘅重磅股。搵和黃C輪炒，絕對冇輪多眼亂嘅麻煩，得隻2157，其他嘅，咪嘥時間摷啲數據。2157明年1月到期，溢價得0.9%，槓桿率11.5倍（有效9.5倍）。正股喺咁意見番9月初個位，升返上63.25元，2157可見74仙，執4成以上。
滙控C輪：滙控（005）上周五本港收130.50元。倫敦價收917.5便士（折132.11港元），成交增55%。倫敦收市後4個半鐘頭，到紐約收，美國滙豐ADR收85.32美元（折132.62港元，每股ADR等於5股），成交大增1.5倍。外圍價咁嘅表現，滙控將新高後又新高。
滙控C輪4441溢價0.2%，靚絕，同一發行商發行嘅4440，壽命短近4個月，4441拍埋去係贏晒。拍埋好多隻壽命較短或溢價稍高嘅同類輪，又係最吸引。
章盛