美國音樂雜誌《Billboard》每年都會綜合各藝人嘅巡迴演唱收入，繼而喺「BillboardBackstagePass頒獎禮」作表揚。呢個頒獎禮嘅得獎名單啱啱喺噚日公布，今年麥當娜（Madonna）嘅「Re-InventionTour」，總共有九億八千萬港元收入，成為全年賺錢之冠，而Prince及JoshGroban原來唔聲唔聲都創咗紀錄（見附表）。
娜姐今年嘅巡迴雖然訂價超高，嚇怕唔少人，但係個巡迴騷開咗五十六場巡迴，其中有五十五場爆滿，總共帶嚟約九億八千萬港元收入，獲「最高收入巡迴演唱會」獎。而一年前嚟過香港參加「維港巨星匯」嘅Prince，佢所開嘅「MusicologyTour」密食當三番，原來係過去一年賣得最多飛嘅騷，成為「最高售票量巡迴演唱會」。
至於音樂人JoshGroban雖然唔係太紅，但佢亦成為係「最高收入小場地巡迴演唱會」嘅得主，即係話細騷嚟講，佢最賣座。至於搖滾樂隊RedHotChiliPeppers今年喺倫敦海德公園開嘅騷，共得一億三千萬港元，成為「最高單場收入巡迴演唱會」嘅得獎者。
至於今年頻頻開騷的LinkinPark，亦得到「突破巡迴演唱會藝人」，即係話佢哋喺一年之內嘅成績，算係最突飛猛進。