今日是「樂施毅行者」比賽最後一天，截稿前接獲樂施會PR姐姐報喜電話，謂今年第九度參賽的陳國強（KK）雖比冠軍慢36分鐘，但卻以12小時33分破自己紀錄奪亞。這位有「毅行者先生」稱譽的三屆冠軍得主，舉凡用腳去跑的活動都鼎力參與，但原來10年前，他與你我一樣是個典型懶骨頭，一切改變源自一份鬥心……
記者：尹珊珊
攝影：陳盛臣、楊錦文
小檔案
陳國強（KK），44歲，消防員，1998至2000年三屆「毅行者」冠軍，2001年雖屈居亞軍，卻以13小時15分打破大會紀錄，參加過「苗圃挑戰十二小時」、「GreenPower環島行」、「嶼行者」、「渣打馬拉松」，獲獎次數多不勝數，現為「傲遊人」核心成員，積極培訓新人選手。
身為紀律部隊人員，KK對人對事極嚴格，首次會面，我們陪同新手Jonathan找他傳授跑山秘訣，即見識他的剛直認真：「同親我跑，都無好結果，非死即傷㗎！如果要認真跑，就要每個禮拜風雨不改咁操練，做到拋妻棄子嘅境界。」新手Jonathan見有機會與高手切磋，即把握時間問：「上年我玩『毅行者』行到第八段，腳底生晒水疱頂唔順放棄，點解救先？」KK即道：「梗係平時練得唔夠啦，如果平時持續咁練，雙腳操慣咗，又點會有呢個問題出現？」
KK堅持定期操練，懶理翻風落雨依然全年無休山頭奔跑：「要完成100公里除咗體力，心態亦非常重要。我知你哋實話無信心行到，藉口啫，唔想面對辛苦啫！」時間有限，他盡量抽重點竅門教路：「一開始唔好心急，谷得太勁好易抽筋。」「唞氣時盡量做到兩呼兩吸。」匆匆上一課速成班的Jonathan自言獲益良多，離行前忍不住悄聲問：「係咪所有消防員都咁跑得㗎？」
1993年，KK由駐守市區十多年的城市消防員，調往西貢參與高山拯救工作：「當時莫講話行山，就連麥理浩徑都未聽過，做過幾單高山拯救Case後，發覺分秒必爭好重要。10年前Call英軍直升機唔易，邊有𠵱家飛行服務隊咁好，惟有熟讀地圖，研究點樣可以用最短時間上山救人。」
自此KK刻苦操練，縱橫山頭野嶺跑上跑落：「嗰陣都未知『毅行者』係乜，有次遇到個參賽者問路，講開先知要行成100公里，我見到好多幾十歲嘅人都參加，自己心郁郁試吓，一玩就上癮嘞！」96年，KK首次參賽，18小時走畢全程。翌年，KK已勇奪全場第三名。「玩開就有鬥心，希望再突破成績，98年贏埋啹喀得冠軍，打破啹喀實贏嘅傳統，即時信心大增。」今年，KK聯同三名猛將第九度出征，初期望打破上年成績以少於13個小時入三甲，現在奪亞，超標完成了！
短短十年，由零變有，KK成為本地多項大賽常客，樂於與人分享實戰經驗：「體力、飲食、呼吸等細節都會影響成績，自己有心得唔介意同人分享。」找他幫手操練純粹拍膊頭，不講報酬。操練過程中，KK發現原來發揮他人力量也可間接行善：「有次養和醫院有班醫生想玩『毅行者』，搵我幫手操練，佢哋最後生嗰個都老過我，最後籌到90幾萬，諗諗吓訓練多啲人參賽咪重好，一樣可以間接做善事。」
不獨消防局同仁，太太也是KK拉攏對象：「老婆玩過兩次『毅行者』，成績算係咁啦，兩年都係行27個鐘。」與這個魔鬼教練跑山，非有莫大毅力和恒心不可，未知太太可有優待？「跑山要六親不認，老婆都無情講。」雖不憐香惜玉，每次放假又跑山不見影蹤，但KK揚言自己是個好老公：「我唔煙唔酒唔賭，準時畀家用，算係咁啦！太太都唔會點詐我型。」
「毅行者」結束，KK即積極備戰下年四月的「撒哈拉馬拉松」，同行者還有著名DJ蘇絲黃：「99年我跑過一次，事後接受電台訪問，阿蘇話希望可以喺50歲前做一件挑戰自己嘅事，重開咪問有無聽眾一齊去，衰在自己辣起個火頭，𠵱家騎虎難下喇！」近數月，他開始特訓一班新手：「將自己嘅經驗傳授畀佢哋，希望大部份參賽者都可以順利完成。暫時成績有50分啦！佢哋跑得勁辛苦，次次都講晒粗口咁滯，我唔理，總之迫佢哋一定要行。」
當年他往撒哈拉跑馬拉松，過程頗為戲劇化：「第一次跑沙漠，諗住旨在完成就算，頭三日都跑得好滋油，沿途重好悠閒咁執地下啲柱形水晶石，放滿成袋。」白晝尋寶，夜晚紮營，同營有前和黃大班馬世民：「佢話日本仔都可以跑到五十幾名，點可以輸畀佢哋。」就是一場牙骹戰和一份不服輸的精神，KK忍痛捨棄背囊內的水晶石，用一日時間發力，由首三日的一百六十多位追回一百名，最後不僅以全場第48名成為亞洲冠軍，並贏得一頓晚餐作為牙骹戰的獎品。
林揚輝，KK前任上司，支援隊成員：「我以前都玩過『毅行者』，但無佢咁瘋狂，佢認真執着，對自己要求好高。」
TC周（左），戰友兼「傲遊人」贊助人：「欣賞KK夠認真，做咁多義工都唔係為名為利，好單純，不過同佢一齊操咗幾年，都有種去咗地獄的感覺！」Tiger（右），KK同事，比賽期間負責大廚一職：「覺得佢跑山之後更懂把握時間，雖然幫佢做支援有少少壓力，但自己都係當遊戲咁玩，過程中都好開心。」
