馮仁昭四圍超：
阿Sa怕輸畀王菲柏芝拒戀霆鋒

由蔡卓妍（阿Sa）同鄭伊健主演嘅電影《阿孖有難》，噚日喺尖沙嘴舉行活動，電影公司重叫佢哋兩個玩拔河。咁啱有報道話阿Sa暗戀咗伊健好耐，但最後因為未能「開花結果」，所以轉投謝霆鋒懷抱。佢兩個噚日講到呢單嘢時，毫不避嫌嘻哈大笑，重異口同聲話有段咁嘅新聞好抵，可以幫部戲宣傳。

樣貌身材皆不及
經常俾人話暗戀藝人嘅阿Sa，噚日回應時就答得好簡短，同平時滔滔不絕嘅態度好唔同，佢重扁嘴話寧願寫自己同伊健好過其他人，佢話：「總知唔好寫我同霆鋒啦，同佢寫埋一齊就俾人寫足幾個月，而且啲雜誌會將我同王菲、張栢芝比較，我實輸啦！佢哋樣好、身材好，事業又好。」
至於伊健一聽到話阿Sa暗戀自己就話：「唔係啩？我哋雖然冇搞儀式，但係結拜咗。我覺得佢當我係大哥哥，呢啲係咪電影公司嘅宣傳橋？如果係宣傳伎倆，大家就幫手寫多啲。」伊健講到最尾重想轉移視線，話阿Sa其實係暗戀林曉峰，搵邊個信？

高峰舊愛認曾收十萬
那英男友高峰嘅私生子事件尚未解決，不過舊愛王納文就因此出晒名，之前重有傳有唱片公司會同佢簽約，前晚王納文喺湖南接受訪問，佢否認會做歌手，但就認以前同高峰拍拖，曾經收過對方十萬蚊，佢又話𠵱家嘅高峰變得不負責任，唔配做男人。

譚耀文賀長者畢業
譚耀文同胡楓噚日出席喺嶺南大學舉行嘅《康齡大學第二屆畢業典禮暨智齡社區大學開展禮》，以嘉賓身份頒發畢業證書畀一班長者，譚耀文提到無綫「我最喜愛的男主角」獎項嘅時侯，話睇好林保怡，佢話：「我都知黃子華喺網上投票暫時穩守第二，不過自己同保怡多年老友，梗會加啲感情分嘅。」

劉浩龍抗拒同鄭融合照
劉浩龍、董敏莉同鄭融噚日喺銅鑼灣出席活動嗰陣，記者本來邀請緋聞男女劉浩龍同鄭融合照，但劉浩龍堅決拒絕，重話驚被人誤會佢博宣傳，最後要拉埋董敏莉企喺中間至肯制，而佢同鄭融兩個都面有難色，場面頗為尷尬。