無綫首次發行限量珍藏版《金枝慾孽》DVD，昨日劇中演員在奧海城出席簽名會造勢。黎姿負腳傷支持，鄧萃雯則自稱喉嚨沙啞失聲，但仍吸引近二百人圍觀，場面熱鬧。
無綫乘着《金枝慾孽》的熱潮，旋即推出三千套《金》劇限量珍藏版DVD，不過早前曾因為代理權問題，令不少銷售商不滿，怨聲載道，終於事過境遷，昨日《金》劇限量珍藏版DVD正式面世，無綫安排了該劇的主要演員佘詩曼、黎姿、鄧萃雯、林保怡和陳豪，到位於奧海城的總代理現代音像舉行簽名會。
簽名會在下午三時開始，引來二百人圍觀，據知有fans在唱片舖開舖前已開始排隊。唱片舖原本安排了一百隻DVD即日出售，由於反應熱烈，有超過一百人排隊購買，唱片舖只好加售DVD。
黎姿穿拖鞋出席簽名會，左腳踭包上紗布，她表示因為日前練習台慶表演的踢躂舞時，不小心扭傷左腳，她說：「其實我幾年前已經扭傷過左腳十字韌帶，所以咁易傷，呢個星期都唔可以着高跟鞋，休息一個禮拜就可以再練習，我唔會推台慶呢個表演，我點可以咁做。」
鄧萃雯則表示因感冒傷風致失聲，她說：「前晚我感冒，未好番，把聲所以好沙，我都驚今日自己講唔到嘢，變咗啞人，但係原來黎姿同我一樣咁黑，我就啞佢就跛。」
提到台慶搞笑劇《金枝慾孽》搞笑版由曾志偉飾演「如妃」，鄧萃雯得悉此事異常驚訝，她說：「咁肉酸！做乜扮我，不過志偉扮都冇林保怡咁嚇人，因為佢似一個冬瓜，佢應該冇我咁有character。」
而陳豪在簽名會上被問到有報道指廖碧兒「翻𠝹」劉愷威，他說：「我哋一開始就係同事，一直都係大家傳，珍姐（曾勵珍）一向都冇理，同珍姐食飯都係講公事。」
此外，林保怡前晚出席於海港城舉行的Aigle時裝表演活動時，指網上「男、女主角」博彩他的賠率愈來愈熱，並笑言已預備講詞以便屆時攞獎後發言。
採訪：楊潔雯 攝影：仇志德
