日本新一代歌姬中島美嘉，平日多數都以cool到爆嘅型女打扮示人，不過，早前美嘉幫日本時裝雜誌《PS》影相嗰陣，就分別着咗三套傳統和服出現，為fans帶嚟耳目一新嘅感覺。
美嘉為咗宣傳啱啱推出嘅新細碟《LEGEND》，最近着上多套華麗嘅和服，為最新一期日本時裝雜誌《PS》擔任封面女郎，重同讀者分享着和服嘅心得。
日本傳統和服通常都畀人高貴大方嘅印象，但向來打扮前衞嘅中島美嘉，即使着起和服上嚟亦特別有型。身穿一套紅白色和服嘅美嘉，將長髮三七分界，盤喺頭上，最特別嘅地方係佢喺頭髮同衫領上面，加咗隻有型嘅黑蜘蛛裝飾，認真搶眼，再加上美嘉一對smokyeyes，令呢個和服look營造出與別不同嘅邪氣。
美嘉另外重換上一套黑色同紫色嘅和服出現，成熟感頓生之餘，一頭鬆散嘅頭髮別具慵懶感，難怪佢自己都話着親和服都會令佢心情特別唔同。但着和服時一定挺直腰骨，連行路都唔可以太大步，就連美嘉都話非常辛苦。
雖然美嘉今年只得二十一歲，但原來佢對着和服都好有心得。佢話𠵱家市面上有好多改成迷你裙咁嘅變種和服，但係身為日本人，點都係着番傳統嘅和服靚啲，不過如果想特別啲，不妨喺飾物配襯上加啲心思。美嘉重透露自己喺舞台上着嘅和服，好多時重係由佢媽咪自己一針一線咁親手縫製㖭。