鄭少秋縱橫電視圈三十多年，這棵長青樹屹立不倒的秘方，就是樹立應有的明星風範，他自爆初做男主角時，月薪雖只得二百五十元，卻不惜訂做四套共逾千元的西裝，又日袋三包煙派給工作人員充闊。
現年五十五歲的鄭少秋，縱橫電視圈三十餘年，人前人後，都尊稱他為秋官，由七十年代的粵語片，到今日二十一世紀的電視劇，秋官的男主角地位從未受到動搖，堪稱電視圈的長青樹，但日前秋官坦言，他的星途不是大家所想般順利。
「我十六歲已經對演戲好有興趣，於是走去投考當年一間叫做大喜影業公司開嘅演員訓練班，點知讀完之後淨係有機會做臨記，電影公司冇同我簽約，於是我又走去投考同文電影公司嘅訓練班，當年良鳴同鍾景輝都有份教我做戲，但讀完之後，結果又係一樣，於是我又走去考邵氏南國訓練班，當年同學有潘迎紫同岳華，但訓練班畢業之後，又係唔簽我，前前後後，都花咗四年。
「其實我屋企人一直好支持我，記得喺我第一次衰咗之後，屋企人話不如自己投資搞演員訓練班，但最後都唔成事。」
在這四年斷斷續續的訓練班生涯中，秋官做過臨記、嘗過白眼，自尊心嚴重受創。
「當年邵氏開部戲叫《文素臣》，話要喺訓練班搵六個新人去做，為咗試鏡成功，我每日好畀心機練習，後來真係被選中，點知拍嗰日先知只係拍我個影，完全見唔到樣。」
「重有一次，我上咗公司接載演員嘅van仔度坐，點知有位有知名度嘅男演員當眾指住我話：『呢部車唔係你呢啲人上得！』呢句說話一直哽住個心哽到𠵱家。」
也許就是這口咽不下的氣，驅使秋官更加努力，他找良鳴私人授課，當年所學的，原來是周星馳在《喜劇之王》中醉心研究的「俄國戲劇大師」史坦尼斯拉夫斯基（ConstantinStanislavsky）的著作《演員的自我修養》。
「佢嘅方法好實在、好有系統，演技即係生活，將生活擺上去就可以。」
除不斷學習，秋官還參加街坊福利會舉辦的話劇比賽，結果憑《手足情深》取得冠軍，還被堅成電影公司老闆關志堅睇中，安排他參加陳寶珠主演的電影《黑殺星》男主角試鏡，結果一試即合，改寫了秋官一生。
「第一部戲就同陳寶珠合作，梗係開心啦！當年男主角啲西裝全部要自己畀錢做，做一套靚西裝要二百八十蚊，雖然當時我月薪只得二百五十蚊，但做得男主角，一定唔可以失禮，所以我一次做夠四套，平時熱到死都着住佢，唔單止咁，每日我會袋三包煙，周圍派畀工作人員，出入都搭的士，做明星要有明星格，以前謝賢佢哋開跑車，我搭的士已經係好渣，以前啲明星，你幾時見過佢哋迫巴士？」
