本周兩件，第1件揀第一太平（142），理由有3個。第1，一太旗下PLDT（菲律賓長途電話）頭3季業績靚爆鏡，賺逾26.4億港元，較上年度同期大升32倍。PLDT乃一太重要資產，個仔咁叻，阿媽理應水漲船高。
第2，德銀上周五申報，在本月1號增持1000萬股一太，經增持後，德銀持有一太的股權，已由4.84%增至5.16%。大行肯加碼，當有智珠在握。
第3，大摩最近出報告推介，估計一太每股實際NAV值4元，以現價2.125元計，折讓近4成7，非常抵買。盈利能力方面，估計全年每股賺30.4仙，增長近5成，PE將由10.5倍大降至不足7倍。大摩預期一太股價可見3元，即係可以大升41%，到價之時，一太仍有兩成半折讓。
本周第2件滙漢（214），亦係抵買貨色。截至今年3月底止，滙漢資產淨值為20.9億元，即每股12.05元，股價現為3元，折讓高達75%。
滙漢股價經常有折讓，理由係業績醜怪，連續6個財政年度錄得虧損，而且負債唔輕。不過，世事係會變嘅。滙漢現年度幾可肯定轉盈為虧，因為過去幾年的大撥備，應該不會再有，而且今年4月出售所佔淺水灣GrosvenorPlace，應佔溢利已達9000萬元，05年度盈利料有1.5億元，每股賺98仙，PE僅3.1倍。業績好番，加上現金回流大增，財政狀況大為改善，折讓如果繼續咁大就唔啱數，若折讓縮至55%，股價可見5.4元，升8成。
錢雋