噚日九龍華仁書院幫佢哋本慶祝創校八十周年嘅特刊《五十六號的星光》搞咗個發行儀式，八方亦有出席。個儀式可以話係星光熠熠，唔少今時今日貴為政治明星、富商嘅「九華仔」都畀面出席，好似立法會議員梁家傑同涂謹申、行政長官前高級特別助理路祥安、電訊盈科副主席袁天凡……等等，真係數都數唔晒。
一班昔日同窗聚首一堂，梗係唔少得互爆讀書時候嘅趣事。袁天凡同路祥安原來係同班同學，袁天凡同八方講，路祥安當年係佢哋班上嘅才子，成日同人改花名之餘，重興吟詩作對，舞文弄墨㖭。袁天凡又讚路祥安講故事好叻：「佢成日將啲歷史人物嘅故事改編，加鹽加醋咁講。」估唔到，當年喺民調風波嘅聆訊上自稱係「鸚鵡學舌」嘅路祥安唔止有鸚鵡才華，重識作嘢。
除咗校園逸事，咁耐無見路祥安，八方當然要問吓佢近況啦。路祥安話佢𠵱家喺東方海外做得幾好，暫時都無諗過返政府做。但問佢如果第三屆特區政府班子搵佢出任公職，佢做唔做，路祥安不置可否之餘，淨係話「有啲嘢係要守秘密」。莫非佢已經知道第三屆特首係邊個？
（圖）袁天凡（右）同路祥安（左）係同班同學，佢大讚路祥安當年係班中「才子」，好叻作古仔。
成啟聰攝
傳真︰2623-9278
電郵︰