中文大學工商管理學院連續兩年搞咗個ＭＢＡ「星級校友學長計劃」，請咗四十名身為中大ＭＢＡ校友嘅商界領袖協助中大培訓班ＭＢＡ一年級學生，八方睇過份名單，都算幾陣容鼎盛，包括有房協前主席鍾瑞明、恒生董事總經理兼副行政總裁陸觀豪同埋《信報》老總陳景祥等。
不過喺噚日嘅計劃開展禮上，就唔係粒粒星都有出現，八方見到其中一粒星——加德士石油（大中華）集團有限公司總經理郭佩明，諗住乘機問佢點解油公司總係加價快、減價慢，點知佢就耍手擰頭，但就好樂意講吓呢個學長計劃。佢同八方講，參加呢個計劃嘅學生都係年輕人，年紀同佢班下屬差唔多，透過計劃可以知多啲年輕人嘅諗法，真係幫到人又幫到自己咁話。
傳真︰2623-9278
電郵︰