美國總統大選，布殊最後僅以小量票數險勝，足以證明大多數人民對布殊嘅戰爭意向，投以不信任一票。電影史上有數不清嘅戰爭片，大部份打住宣揚反戰訊息嘅旗號，不過要數最令人震撼者，算係韓國片霸《太極旗飄揚：生死有情》，睇完全片，簡直令觀眾有種直接參軍嘅感覺，見盡生死血戰，不寒而慄！
記者：徐影龍
叫得韓國片霸，梗有番咁上下。憑《生死諜變》升為國寶級導演嘅姜帝圭，由籌備、試鏡到拍攝，足足花咗四年時間，萬幾個臨記令戰爭場面更為真實，而演員亦毫不含糊，搵嚟《朋友》中嘅熱血型男張東健飾演大佬李振太，再搭個《藍色生死戀》入面人氣爆晒燈嘅元斌做細佬李振錫，製作陣容可算出盡頂班人馬，難怪輕易打破韓國多個票房紀錄，本土入場觀看多達1,200萬人次，足足等於全港市民每人睇兩次！最遺撼係劇中兩名角色只屬客串性質；一個係李振錫索爆孫女，另一個就係奪得康城影展評審團大獎嘅《原罪犯》主角崔岷植，只係扮個被追殺嘅北韓軍官，三兩下手勢就俾人生擒咗，勁失望。兩者都令人有到喉唔到肺嘅感覺。
故事講述1949年南、北韓大戰時期，兩兄弟無厘頭俾南韓軍方強徵入伍，為免細佬受戰爭之苦，大佬決定奮不顧身，不斷博出位爭功績，為嘅係盡快攞到榮譽勳章，申請將細佬調離軍隊。為勳章，振太搏到命都唔要，所有危險任務攬晒上身，漸漸地連同袍嘅命都唔理，甚至錯投敵軍嘅死黨都唔放過，殺人殺到麻木晒。影片後期，兄弟雖已反目，不過從一封家書中，細佬真正感受到大佬嘅全心全意，最終殺入敵陣，親手救番個大佬。
戰爭片最能宣揚反戰意識嘅劇情，肯定係一幕又一幕嘅血腥殘殺。《太》片中超過一半時間，都係打打殺殺，炮火連天炸到斷手斷腳已屬指定動作，更多嘅係埋身肉博圍毆戰，一劍穿心、火燒全身、屠殺村民等等，睇到人毛管都戙起晒，愈睇就愈覺戰爭之可怖。
值得一讚係每個戰爭場面都好有心思，被斷糧斷水等死嘅士兵，放手一博反擊敵方，奇迹地一打十都贏到；坦克攻城戰力取敵方首腦；戰機制空狂掃地上士兵，以及中國10萬大軍壓境幫北韓拖等，都好有震撼力，雖欠缺《雷霆救兵》搶灘戰嘅經典性，不過勝在每場戰役水準都好平均，更畀到人一種真正有氣勢嘅感覺，個人覺得比吳宇森嘅《烈血追風》及米路吉遜嘅《軍天壯志》更精采。
特別版VCD及DVD，都附送大量精品，如硬皮筆記簿、雙面PostCard等，就算普通版都有兩隻DVD；Disc1收錄全無刪剪嘅150分鐘終極III級版電影，而Disc2屬BonusDisc，例牌地有預告片、導演及主角們嘅專訪，最差係製作特輯，長達40分鐘，由搵景拍攝、道具製作到槍戰場面都有收錄，本來甚有睇頭，可惜一粒中文字幕都冇，嘰喱咕嚕都唔知講乜，失敗！
《太》片在韓國堪稱超大製作，投入嘅人力物力達國際級水準，但在港上映時，即使多位影評人豎指大讚，票房仍平平無奇，歸根究柢，都係片名累事。齋睇《太極旗飄揚》，已經娘到爆，重要加個副題「生死有情」，問十個有九個都話老土，改名者實「應記一功」！查實《太》在韓的確意譯為太極旗，意指南韓嘅國旗，當攻下一個軍事據點後，軍隊會喺該處山頭高掛太極旗，而片名所表達者，就係勝利及歸家嘅意思，明冇？
影片類型：戰爭片
級別：III級
區碼：3區
DVD音效：AC-3EX/dtsES
普通裝VCD：$48 普通裝DVD：$95
精裝版VCD：$65（送精美POSTCARD及筆記簿）
精裝版DVD：$129（送精美2005年月曆及信封信紙）
亞洲影帶出版社有限公司
查詢電話：27505595