去年「七七事變」反對國安法條例草案成為人民英雄嘅自由黨主席田北俊，噚晚喺有線電視節目上自爆，喺民望如日方中之際，其實有諗過去馬選特首，不過佢精於做生意，打完一輪算盤後，覺得冇乜必勝把握，都係做「幕後黑手」kingmaker好，之後就大讚前黨友財爺唐英年腳頭好，理念同自由黨最接近，田少捧邊個，大家心照啦。
反23條一役令田少成為北京眼中「壞孩子」，佢話冇評估過同北京關係受損程度，但以前自由黨提出約晤京官，好易就搞掂，𠵱家就差啲嘞，不過年多以來都見過兩次副主席曾慶紅，比起大狀黨同其他左派，仍然有啲江湖地位。
自由黨今屆立法會取得兩個直選議席，田少話今日會同黨員開個集思會，傾傾日後發展大計。佢坦言希望四年後每區有一人當選，加埋佢同周梁每人帶一個新人當選咁就最好嘞。
至於有冇信心執政，田少話相信最少要佔立法會三分一議席，先至可以說服到北京畀你執政；自由黨𠵱家得十席，有排都未夠數。八方就覺得，民主派夠有二十幾席啦，北京又點對佢哋呢？
傳真︰2623-9278
電郵︰