八方噚日見到教育統籌局局長李國章，梗係叫佢評論吓教統局進修基金俾人呃咗幾十萬單嘢啦，有行家質佢話係咪審批過於寬鬆，搞到俾騙徒有機可乘？亞瑟王不愧為亞瑟王，除咗例牌回應話單嘢𠵱家由廉署查緊，無乜好講之外，竟然爆出一句：「如果政府攞啲錢出嚟係無吸引力嘅話，就唔會吸引人嚟呃啦，咁就證明筆錢有吸引力。」
佢又例牌講吓以後會同警方、廉署多啲合作，防止同類事件發生。諗諗吓，八方都幾佩服亞瑟王嘅急才，識得將啲嘢掉轉嚟諗，再打橫嚟講，將壞事講成好事。唔似得阿董咁，做錯嘢之後淨係識講「我哋會吸取教訓……從善如流」咁無新意。
（圖）李局長（左）話，有人呃進修基金即係證明基金有吸引力，咁都俾佢諗到，唔怪得人哋做到局長，八方就做唔到啦。
曾顯華攝
傳真︰2623-9278
電郵︰