除咗和記之外，到呢一刻為止，喺香港只有數碼通實牙實齒講明聖誕前推出3G，剩番SUNDAY同CSL重未講幾時推出，前者搵埋祖國嘅華為電訊做「拍拿」，仍然成日俾人話佢無料到、唔會出到3G……搞到SUNDAY話事人許博志呢排都費事再解話。
不過，皇天不負有心人，卒之畀佢搵到個「無價」嘅代言人同佢賣廣告，重證實埋SUNDAY嘅3G網有料到，究竟係邊個？就係我哋嘅國務院總理溫家寶。
話說早幾日，溫總喺北京參觀中國國際通信設備技術展覽會。佢行經華為嘅展覽館時，用華為嘅3G手機、同埋SUNDAY嘅3G網絡，由北京打電話落嚟華為香港辦公室，同華為嘅員工傾吓偈（當然現場重有其他領導人輪流試吓部機）。就係咁，SUNDAY證明咗自己建網並唔係講笑，呢鋪許博志真係飲得杯落！
傳真︰2623-9278
電郵︰