方力申及Cookies成員鄧麗欣（Stephy）昨日到灣仔演出婚紗騷，方力申首次穿上蘇格蘭裙，雖然像女藝人般事先打底，不過仍然感到下身涼浸浸。方力申自言將來結婚一定會大搞，讓老婆威一次。
方力申、Cookies成員鄧麗欣及一眾模特兒等，昨日在灣仔會展為新天地婚紗騷行天橋。方力申及Stephy成為新天地婚紗的最新代言人，兩人均簽下一年合約，酬勞聲稱達七位數字，老闆娘更承諾他日兩人結婚會獲全包贊助。
現年二十四歲的方力申昨日以蘇格蘭裙現身，他說：「我都學啲女藝人咁，打咗底先出場，第一次着裙感覺好得意，下身涼浸浸。」他透露將來結婚必定要鋪張一點，他說：「因為要畀老婆威番次嘛，一定要好好睇睇嘅，我最想去教堂行禮，留個美麗嘅回憶，不過結婚一定先要有事業基礎，我希望可以喺三十歲結婚。」
至於二十一歲的Stephy自言昨日首次穿婚紗，她說：「我初初好擔心自己個樣細個，着婚紗會唔襯，同埋等出場時真係好似等出嫁咁嘅心情！我不時都有結婚衝動㗎，不過就怕麻煩，多數會旅行結婚。」
提到打算何時結婚，Stephy說：「以前我成日希望可以喺三十歲時結婚，𠵱家就工作至上，不過都希望三十五歲左右可以嫁得出，因為我好鍾意小朋友，唔想做高齡產婦。」
採訪:顏英儀
攝影:何國豪
