無綫小生林峯同偶像組合Boy'Z嘅成員張致恆（Steven），一個靠拍劇搵食，一個就靠把口唱歌𢱑銀，雖然呢兩位年輕男藝人好似大纜都扯唔埋，但佢哋同樣受到一件事困擾──就係髮線向後移，三千煩惱絲開始出現稀疏嘅迹象！
講到脫髮呢個問題，相信唔少男士都大感頭痛，加上𠵱家脫髮係有年輕化趨勢，所以都咪話唔擔心。林峯𠵱家先得二十四歲，但可能拍得古裝劇多啦，佢每拍一套古裝劇，就要連續幾個月戴住頭套，咁戴頭套又要黐膠水，久而久之會令前額同髮側毛髮脫落。之前有唔少男藝人都同馮仁昭講，話戴頭套之後，頭部嘅毛囊長期俾膠水影響，搞到頭髮冇得生長，唔知林峯係咪因為咁，近排佢開親工都要自己整頭髮，唔畀負責set頭嘅阿姐埋身。
至於Steven就重大件事，佢得嗰十九歲，但額頭已經好似反光板咁，若果佢拍清裝戲，唔使剃頭都黐得頭套，唔怪得之早排佢位緋聞女友傅珮嘉咁緊張，四圍問人有乜醫脫髮嘅妙方啦！
唐季禮早排俾一杭州報章話佢前女友懷孕跳樓，佢覺得聲譽受損，所以告呢份報章。前日案件喺上海市第一中級人民法院開審，唐季禮冇出庭，只委託兩位律師做代表，要求被告登聲明道歉同賠償經濟損失六百五十萬港幣同精神損失一百萬。
應屆港姐亞軍朱慧敏下星期一會出發去海南島參加世界小姐選舉，噚日佢喺將軍澳電視廣播城試晚裝，佢話今次參賽好大壓力喎，唔通同符思思早排參選國際小姐攞到友誼小姐有關？朱慧敏話：「係因為今次以香港代表參賽，不過符思思同楊洛婷都講咗好多參賽經驗畀我聽。」馮仁昭希望佢可以為港爭光啦！
導演劉偉強噚日透露荷李活版《無間道》下月開拍，原本畢彼特飾演劉德華個角色，𠵱家就改由麥迪文做，而梁朝偉一角就由里安納度狄卡比奧飾演。劉偉強又話下星期會去美國同導演馬田史高西斯見面，佢話：「今次重會睇吓會唔會拍嘢㖭。」
繼周星馳同周潤發到大學做講座嘉賓後，阿叻陳百祥都唔輸蝕，佢前晚應邀去珠海書院同一班新聞系學生真情對話，講吓點樣成為一個成功嘅節目主持人。阿叻平時鍾意認叻同搞笑，但面對成班學生就好正經，說話重大方得體㖭！佢話自己二十五歲破產後就重頭嚟過，只要肯努力點都會成功，佢重鼓勵學生讀書唔叻唔緊要，最緊要識變通同埋學多啲語言，尤其係國語，因為內地有咁多城市同電視台，機會多的是。
蕭正楠噚日去咗灣仔警察總部協助調查，事緣佢七月出席商台活動時着咗套警察制服出場，警方嗰邊懷疑佢哋之前冇作出申報，所以就搵蕭正楠協助調查。問蕭正楠擔唔擔心，佢就話：「成件事都好簡單，我一直都唔擔心。」
