升得快時散得重快，前兩日借濠江賭業概念炒作的股份，噚日好多跌勢甚急，其中以老虎仔兄弟的遠東酒店（037）及遠東科技（036）跌得最急。
反而新濠國際（200）就腰力驚人，雖然噚日最低跌穿10元，見過9.90元，但最後抽回10.80元收市，跌幅收窄至1.37％。經紀陳話，話晒人哋都係賭王個仔，與其他概念股不同，自然企得硬好多。
另外，早排股價無端下滑的魏橋紡織（2698），在公司管理層與證券界人士傾過一輪後，股價終於有番起色。魏橋基本因素冇大變動，加上棉花價格繼續下跌，股價有機會重拾升軌。
魏橋早排股價走勢實在唔多掂，由13元水平跌到最低10.75元。原來街外有個大芬一路減持，原因可能係換馬或者沽貨獲利，由於股價積弱，所以惹來唔少揣測。最近有分析員見過管理層，佢哋堅持公司冇事，而報告出咗後，股價亦回升。
魏橋噚日再升2.5％，收12.20元，成交金額5202萬元。
慕容小初